Cinîyan ra mesajê Newroze: No wezîfeyêk tarîxî yo

2026-03-11 11:18:20


	 

	Elfazî Toral

	 

	STENBOL - Cinîyê ke tewrê deklerasyonê Newroza Stenbolî bîyî vatî: “No vengdayîşê semedê Newroze tenya sey sembolê tarîxî nê, sey platformê demokrasî û piştîdayîşê gerdûnî yo. Semedê heme şorişgêr û hêzê averşîyayîşî hemverê nê şerî berpirsiyariyê danê milê ma. Ma venga heme kesî danê ke wareyê Newroze de bêrê têhet û hemverê zilmî adirê xo gur bikerê.”

	 

	Newroza ke bîya adirê azadîya kulturê kurdî nêtefêna, her serre 21ê Adare de yena pîrozkerdiş û bîya xoverdayîşê gerdûnî. Partîya Têduştî û Demokrasîyê Şaran (Partîya DEMî) Stenbol de 9ê Adare de bi sloganê “Newroza Azadî û Demokrasî” eşkerayîye da. Temsîlkarê partîyê sîyasî yê ke tewrê deklerasyonê Newroze bîyî ajansê ma rê qisey kerdî.

	 

	Waştiş

	 

	Hemsereka Pêroyî ya Partîya Xelasîya Newe ya Sosyalîstî (SYKP) Feray Mertoglu va Newroza emser prosesê awankerdişê aştî û cimatê demokratîkî de pêşwazî kenê û va ganî her kes hemverê venga aştî û cimatê demokratîkî de bi hîsgêr têbigêro. Feray Mertoglu wina va: “PKK’yî çeke verada û xo fesh kerd. Ma Newroze de hetê AKP-MHP’yî ra gamêka diyîne pawenê. Nimûne ganî şert û mercê Birêz Ocalanî bêrê başkerdiş û tepişteyê nêweşî bêrê veradayîş. Ganî şaredarîyê qeyûmî ameyî tayînkirdiş newe ra bêrê teslîmkerdiş. Ganî Hemşaredarî bêrê wezîfeyê xo ser.”

	 

	‘Ganî ma wayîrê ci vejîyê’

	 

	Alin Terî ra Muruvet Kuçuk zî ard ziwan ke Newroza 2026ine prosesêk krîtîk de yena pîrozkerdiş û wina va: “Her çar hetê Kurdistanî averşîyayîşê muhîmî yenê ciwîyayene. Şarê kurdî bi serran o bi rîskê vindabîyayîşê destkewtişan rî bi rî yo. Newroze demêk muhîm de yena pêşwazîkerdiş. Kurdî semedê waştişê xo her çar hetî de lingan ser o yê. Ma hetê Tirkîya de vajê proses zaf bêhêvî nîyo. Pêwa prosesêk est o hîna gamê qanûnî nêameyê eştiş. Ganî ma wayîrê bedelê neteweyêk vejîyê. No semedê merdimayî ferz o. Na Newroze prosesê sîyasî ra wêdeyêr, her çar hetê Kurdistanî de zemînêk xeylêk xurt de yena pêşwazîkerdiş. Na Newroze tenya şarê kurdî nê, heme şaran rê berpirsiyariyan bar kena. Bi nê hişmendî ganî her kes wareyê Newroze de bibo.”

	 

	Endama Meclîsê Partîya DEMî Aylîn Hacaloglu zî wina va: “Sey her serre emser zî Newroze semedê ma xeylêk muhîm û bi qîmet a. Labelê manayêka cîya ya emser est a, ma prosesê aştî û demokrasîyê cimatî de pêşwazî kenê. Bendewarîya şarî pîl a. Ma do semedê aştî û demokrasîyê cimatî 22ê Adare de Yenîkapi de bê. Ma her kesî pawenê wareyê Newroze.”