Rihayijî perwerdeyê bi kurdkî wazenê 2026-09-21 10:20:17   RIHA - Roniştoxê Rihayî dîyar kerdî ke gama tewr samîmî ya ke seba vengdayîşê ‘Aştî û Cimatê Demokratîk’ bêro eştene perwerdeyê bi ziwanê dayîke yo û wina vatî: “50 serrî yo ma seba ziwanê xo têkoşîn kenê. Eke prosesêk est o û samîmîyet est o wa ziwanê ma bikerê ziwanê perwerdeyî.”   Prosesê ‘Aştî û Cimatê Demokratîk’ yo ke vengdayîşê Serekê Şarê Kurdî Abdullah Ocalanî dir dest pêkerdo di serranê xo pirr keno. Nê prosesî de Şarê Kurdî seba ke ziwanê înan bibo ziwanê fermî û ziwanê perwerdeyî xeylê çalakî û bernameyî ardî ca. Kurdistan û bajaranê Tirkîya de wextê neweyî yê perwerdeyî de Şarê Kurdî reyke bîn kewtî wareyan û waştiş kerdî ke tutê înan bi kurdkî perwerde bivînê. Yew bajaranê ke çalakî tede ameyî kerdene Riha bî.   Riha de welatîyê ke tewrê bernameyê derheqê perwerdeyê bi ziwanê dayîke bîyî, derheqê babete de qal kerdî.   ‘Eke zerrî ra yê ganî ziwanê ma bibo ziwanê fermî’   Fîrdevs Acar bala ant serê prosesê aştîye û wina vat: “Bi naskerdiş û heqê perwerdeyê bi ziwanê dayîke ganî dewlete çarçewa prosesî de gamêka zerrî ra bierzo. Seba ke ziwanê kurdkî bibo ziwanê perwerdeyî ma tiya de yê. Ganî ziwanê ma her cayî de bêro qalkerdiş. Semedê polîtîkayanê hukmatî ziwanê ma asîmîle beno. Wa her dadî û babî tutanê xo dir kurdkî qal bikerê. Wa bizanê ke ziwanê ma cuye û heyatê ma yo û ma tu rey dest ziwanê xo ra veranêdanê. Heta ziwanê ma bibo ziwanê fermî ma do têkoşîn bikerê.”   ‘Ganî tutî bi ziwanê dayîke perwerdeyî bivînê’   Yildiz Vural destnîşan kerd ke ganî ziwanê kurdkî bibo ziwanê fermî û wina ard ziwan: “Ganî kurdkî bibo wayîrê statu. Ma ewro seba ziwanê xo ware de yê. Ma wayîrê ziwanê xo bivejîyê û ganî cimat nê het de xebate bikero. Ganî tutî bi ziwanê xo perwerdeyî bivînê. Ma bi ziwanê xo serberz ê. Erebî, tirkî bi ziwanê xo qal kenê. Ka kes mudaxaleyê înan keno? Nê. Wa ê zî mudaxaleyê ma nêkerê. Ziwanê ma rûmetê ma yo.”   ‘Wa ziwanê ma bibo ziwanê perwerdeyî’   Hatîce Goktepe zî wina ard ziwan: “50 serrî yo ma seba ziwanî têkoşîn kenê. Wa ziwanê ma bibo ziwanê perwerdeyî. Ez ewro seba ziwanê xo tiya de ya. Ganî ziwanê ma bibo ziwanê fermî. Wa mekteban de kurdkî perwerde bêro dayene. Ma pêro çîyan dir ziwanê xo pawit. Eke vanê prosesêk est o û zerrî ra yê ganî ziwanê ma bikerê ziwanê perwerdeyî û statu bidê.”   ‘Ma do ziwanê xo bipawê’   Hemsereka Komeleya Averberdiş û Cigêrayîşê Ziwan, Kultur û Hunerê Kurdî (ZIWAN-KURD) Stran Bozkaya zî destnîşan kerd ke ê seba ziwanî her tim wareyan de yê û wina dewam kerd: “Ma ewro seba ziwanê xo tiya de yê. No proses ma rê muhîm o. Eke dewlete biwazo seba prosesî çîyêk bikero ganî seba ziwanî game bierzo. Ziwan ma rê muhîm o. Estbîyayîşê ma girêdayê ziwanê ma yo. Nê semedî ra ma do her tim ziwanê xo bipawê.”   Fatma Soysal zî dîyar kerd ke ganî ziwanê dayîke bibo ziwanê fermî û wina vat: “Ma nêwazenê ziwanê ma tena ziwanêko ke mîyanê keyeyî de bêro qalkerdiş. Tutê mekteban de bi tirkî dersan vînenê û kurdkî vîrî kenê. Nê semedî ra wa ziwanê ma bibo ziwanê perwerdeyî.