Veradayîşê 9 tepişteyanê Sîncanî 36 rey ame peysereştiş

2026-10-07 11:39:41


	 

	Melek Avci

	 

	ANQARA - Pêwa ke cezayê înan temam bîyê zî, veradayîşê tepîşteyanê sîyasîyan yenê peysereştiş. Ayten Kordu dîyar kerd ke Heyetê Çimdarî û Îdareyî yê Zîndanan sey "mehkemeya diyine" têgêrenê. Yuksel Mutlu zî wina vat: "Sîncan nimûneyê tewr verbiçim ê nê çîyî yo. Ganî qerarêk merkezî bêro dayene da ke no çî lezkî peynî bibo."

	 

	Zîndanê Cinîyan ê Sîncanî de, pêwa ke cezayê înan qedîyayê zî, veradayîşê tewr kemî 8 tepîşteyanê sîyasîyan ê cinîyan bi qeraranê Heyetê Îdare û Çimdarî (ÎGK) yeno astengkerdiş. Veradayîşê Nedîme Yaklav 6 reyan, ê Hicran Binici û Nuriye Adet 5 reyan, ê Devrim Adet 5 reyan, ê Melîke Goksu û Emîne Abiş 3 reyan, ê Fatma Aslan 3 reyan, ê Zelîha Ustabaş 4 reyan û ê Pinar Tikit 2 reyan ameyo peysereştiş. Sîncan de ke serra 2021ine ra heta ewro desine tepîşteyê sîyasî yê cinîyî nêşkenê veradayîşê şertî ra feyde bigîrê, peysereştişê veradayîşan seba "nêzdîbîyayîşo baş", "poşmanî" û erjnayîşanê têkildarê fehmê sîyasîyan mojneno ke ÎGK vuryayo bi "mekanîzmayêk edaletî yê dîyine".

	 

	Parlamentera Partîya Têduştî û Demokrasîyê Şaran (DEM Partî) Ayten Kordu û temsîlkara DEM Partî Yuksel Mutlu derheqê babete de ajansa ma JINNEWSî rê qisey kerdî.

	 

	Ayten Kordu dîyar kerd ke ê demêk derg o binpaykerdişê heqanê merdiman ê zîndanan de anê rojeva parlamentoyî û wina dest bi qiseykerdişê xo kerd: "No demêk zaf derg o ke ma keyeyanê tepîşteyan dir serê binpaykerdişê heqanê merdiman ê zîndanan de xebitênê. Ma nê çîyî kombîyayîşanê xo de û meqamê parlamentoyî ra, sey pêro parlamenteran, bi taybetî parlamenterê cinîyî, bi dewamî anê ziwan. Ma serdayîşê zîndanan zî kenê. Ma xeylêk reyan Parlamento ra neql kerd ke qerarê komîteyanê çimdarî yê bi nameyê înan zîndanan de bi hawayêk zaf keyfî domîyenê. Reyan nê hetî ra tay sistbîyayîş virazîyayo û reyan wezaretê edaletî xesasiyet mojneno. Labelê, ma bi nê pratîkî rî bi rî manenê ke reyan yeno caardiş, reyan yeno vindarnayîş û dima ra bi hawayêk xurtêr dewam keno. Herçiqas cezayê tepîşteyan qedîyayê zî, qerarê zaf keyfî yê sey 'Gelo o poşman o yan nê? O senî têgêreno? Ey senî gardiyan dir qisey kerd? Ey kam ci kitab wendo? Hema zî eleqeyê ey bi siyasetî dir est o?' Nê persê nêraştî yê. Semedê nê çîyî, nê komîteyê çimdarî bi hawayêk hetgir têgêrenê. Çîyo ke ma tewr zêde kombîyayîşanê parlamentoyî de anê ziwan no yo ke nê komîteyê çimdarî çiqas hetgir ê."

	 

	‘7 reyan peysereştiş yeno kam ci mana?’

	 

	Ayten Kordu, bala ant ser ke caardişê verba tepîşteyanê sîyasîyan ê cinîyan xurtêr ê û wina vat: "Bi pêroyî, caardişê heyetanê çimdarî ke qanûn û edaletî ra wetayêr şonê, demo ke îmkan yeno serê cinîyan, zaf xurtêr ê. Nimûne, Sîncan. Ewro, uca de 9 hevalê cinîyî û bi qasê ke ez zana, 3 hevalê mêrdeyî est ê. Veradayîşê tayê înan hetê heyetê çimdarî ra semedê reya 7ine ameyo peysereştiş. Peysereştişê ci semedê reya 7ine yeno kam ci mana? Bi zêdekerdişê cezayêk bînî serê cezayê ke verê ra ameya birnayene, heyetê çimdarî serê bingehî de sey mehkemeyêka diyine têgêrenê, hewl danê ke nê çîyî bi dest bîyarê."

	 

	‘Tesîr bawerîya şarî bi prosesî keno’

	 

	Temsîlkara Hemsereka DEM Partî Yuksel Mutlu zî dîyar kerd ke caardişê zîndanan de tesîr bawerîya şarî bi prosesî keno û wina dest bi qiseykerdişê xo kerd: "Bi raştî no tewirêk provokasyon o. Kombîyayîş, munaqeşe û şêwirnayîşanê ma yê bi beşanê cîyayan ê cimatî, komê dînî û şaranê cîyayan dir, ma bi cimatêko hîşyar, bêbawerîya prosesî û rexnegir dir rî bi rî manenê. Ma nêşkenê nê çîyî înkar bikerê. Yew zî sebabanê nê çîyî no yo ke zîndanan de qewimyeno. Şima merdimêk semedê fehm û fîkranê înan ê sîyasîyan tepişenê. Şima cezayêk danê înan û înan tepişenê. Zîndanî semedê cinîyan qet munasib nîyê, na babetêka cîya ya. Labelê dimayê ke ê cezayê xo peynî kenê û temam kenê zî, heyetê çimdarî ê zîndanan helwestêk dişmenane yê diyinî gênê û cezayanê bînan ser o zêde kenê. No verê ra çîn bî. No caardişêk o ke demê hukmatê AKPî de vejîyayo werte."

	 

	‘Wezaretê edaletî bêşîk nê caardişan ra agahdar o’

	 

	Yuksel Mutlu, qetî kerd ke zîndanê Sîncanî hetê caardişanê xo ra vejêno vernî û wina peynîya qiseykerdişê xo ard: "Xêrcê nînan, Sîncan nimûneyê tewr verbiçim ê nê çîyî yo. Zîndanê bînî zî wina kenê, labelê Sîncan sey laboratuvarêk aseno, her tim veradayîşê cinîyan peyser dano. No nêraşt o. Kes bi nê çîyî serkewte nêbeno. No hukmat zî bi nê çîyî serkewte nêbeno. Keyeyan de û pêro cimatî de kîn û fikaran virazeno. No baş nîyo, nêraşt o. Ganî wezaretê edaletî lezkî fek nê çî ra vera bido. Ez nêfîkirîyena ke nê caardişî wezaretê edaletî ra xoser ê. Îdarekarê zîndanê Sîncanî peynî de memurê wezaretê edaletî yo û binê çimdarîya înan de yo. Wezaretê edaletî bêşîk nê caardişan ra agahdar o. Ez zî fîkirîyena ke hukmatê merkezî na babete de têkilîyêk esta. Bi pêroyî, wezaretê edaletî û hukmat lazim o ke qerarêko merkezî na babete ser o bidê û lezkî peynî bîyarê.”