Cinîya bi têkoşînê xo bî sembol: Doga Şîn

2026-10-13 11:14:24


	 

	Evîn Çiftçi

	 

	RIHA - Doga Şîna ke têkoşînê azadîya kurdî de dinyaya xo bedelnaye, bi serran pey rastîye şî û fek têkoşînê xo ra nêverda. Aye bi têkoşînê xo bîya sembolê azadîye.

	 

	Kurdistan wexto ke hetê hêzanê emperyalîst ra bi çar parçe, bi zaf tewirê zordarî, înkar, şîdet û binpaykerdişanê heqê merdiman rî bi rî mend. Şerê hemverê DAIŞî yê Rojavayî ke 2012ine de dest pêkerd, tesîrêk xorîn cuya merdiman ser o kerd. No şer têkoşînê kurdanê Rojavayî de semedê rêxistinkerdiş û pawitişê wareyê cuya xo serdemêk newe mojna. Xoverdayîşê bi serkêşîya cinîyan ê 19ê temmuze 2012ine de Kobanê de ame averberdiş, bi sebebê têkoşînê cuya şarê kurdî û ameyoxê têkoşînî şekil kerd. Nê prosesî de, zafê cinî mîyanê şer û pêrodayîşan de bîyî beşêk prosesê qerargirewtişî.

	 

	Doga Şîn (Binevş Altay) a ke 22ê êlula 1995ine de qezaya Pirsûsî ya Rihayî ya ke sînorê Kobane ser o ya, ameya dinya, semedê şerê Rojavayî zaf tesîr bî û uca tewrê xoverdayîşî bî. Doga Şîn a ke şer de birîndar bî, semedê dermankerdiş agêra verê keyeyê xo. Dimayê başbîyayîşî, ancî rayîr girewte, na rey ver bi koyanê Kurdistanî şî. Doga Şîn a ke tewrê têkoşînê xelasîya her çar perçeyê Kurdistanî bî, 11ê çeleyê 2025ine de Gare de dinyaya xo bedelnaye. 

	 

	Dayîka Doga Şîne, Uveyş Altay va: "Wexto ke kênaya mi ameye dinya, babîyê aye zîndan de bi. Wexto ke babîyê aye zîndan ra vejîya, aye pay şîne. Wexto ke hema pitik bî, ma aye pêşnayîne û berdêne zîndan. Heme hevalê zîndanî aye ra zaf hes kerdêne. Na taxe de kes çinîbi ke aye ra hes nêkero. Dimayê şîyayîş û ameyîşê dibistane, aye yewser cilê xo vetêne û hetkarîya mi kerdêne. Aye qet yew vatîşêk zî nêvat ke ez aciz nêbî."

	 

	Aye şî Rojava

	 

	Uveyş Altay va ke aye têkoşînê azadîya şarê kurdî bi munaqeşe bi mamosteyê xo, wexto ke sinifa 10ine de bî dest pêkerd û va: "Sinifa 10ine ya dibistana amadeyî de, mamosteyê aye semedê munaqeşeyê kurdan û ziwanê kurdî ser o dibistane de aye şirawit keye. Babîyê aye zî nê semedî ra aye dibistane ra vet. Babîyê aye waştêne ke aye perwerdeyê xo bi rayîrê perwerdeyê dûrî bidomino. O wext, Rojava de şer estbî. Rojêk, wexto ke ma werd viraştêne, aye televîzyon akerd, averşîyayîşanê Rojavayî temaşe kerd û eynî wextî de werd viraştêne. Dimayê werd viraşt û heme merdimanê xo dawet kerd. Ma pîya werd. Dimayê demêk, mamosteyê aye telefon kerd û vat ke Binevşe nêameya dibistane. Mi zerrîya xo de hîs kerd ke aye şîya. Wexto ke babîyê aye ame keye, mi va 'Binevşe şîya.' Babîyê aye va, 'Aye megêrê, wa rayîrê aye zelal bo.' Dimayê ke derbazê Rojavayî bî, aye telefon vîna û ma gêra. Aye ma ra ozr waşt."

	 

	

	 

	'Ez bi têkoşînê kênaya xo serberz a'

	 

	Uveyş Altay va ke aye bi heme gerîlayê ke têkoşînê Azadîya Kurdistanî de dinyaya xo bedelnayî serberz a û va: "Ez bi kênaya xo serberz a. Ez bi têkoşînê ke aye da serberz a. Ma 35 serrî yo nê têkoşînî de yê. Babîyê aye her roje ameyêne tepiştiş û îşkencekerdiş, la ma tu wext fek têkoşînê xo nêverda. Ma bi têkoşînê xo serberz û bi rûmet ê. Û nika û tepîya, lazim o ke her kes semedê aştîye têkoşîn bikero. Darê Rojavayî heme bi gonî ameyî çînayîş. Lazim o ke her kes wezîfe û berpirsîyarîyê xo bizano. Ma bi heme şehîdanê xo serberz ê. Şehîdî qet nêmirenê."