Konferansê Edebîyat û Aştîye: Ganî heqê ziwanê dayîke bêro dayîş 

2026-11-10 15:20:23


	 

	AMED - Encamnameyê Konferansê Edebîyat û Aştîye ya ke 6 û 7ê teşrîna peyêne de ameyî viraştene, ame eşkerakerdene. Encamname de ame vatene ke seba aştîyêka raştikên û domdare ganî heqê çandî û ziwanî bêrê qebûlkerdene û hawîreyêko azadîxwaz bêro aver berdene.

	 

	PENa Kurd 6 û 7ê teşrîna peyêne de Amed de, bi beşdarbîyayîşê zaf rewşenbîran, nuştoxan, helbestvanan û sîyasetmedaran Konferansê Edebîyat û Aştîye viraşt. Namê beşdaranê konferansî ra encamnameyê Konferansê Edebîyat û Aştîye ame eşkerakerdene. Encamname de, ê hetan rê ke Prosesê Aştîye û Komelê Demokratîkî rayber kenê, seba aştîyêka domdare vengdayîş ame kerdene.

	 

	Encamnameyê Konferansî wina yo:

	 

	Beşdarê konferansî fermî û yewvengî ra îlan kenê ke aştîyêka raştikên, rewa û domdare tu rey tena bi bêçekbîyayîş, bi bêparkerdişê sîstematîkê heqanê bingeyînan ra, ya zî bi bêvengkerdişê bi zorî nêşeno bêro awankerdene. Yewbîyayîşêko bingeyin û aştîyêka raştikên tena bi rayîrê diyalogêkî ya ke zerrî ra yena û domdar a, piştîpêdayîş, yewbînî qebûlkerdiş, rêzegirewtiş û seypêyîya pêroyî ya bêşert û merc ra pêk yena.

	 

	Vengdayîş seba aştîye û game eştiş no rayîr de, gameyêka zaf erênî û ganîye a. Labelê seba ke aştî bingeyanê xurt û domdaran ser o bêro awankerdene, ganî heqê çandî û ziwanî bêrê qebûlkerdene û hawîreyêko azadîxwaz bêro aver berdene. Aştî ganî tena bi çek ronayene nêbena. Ganî aştîye terba xo, hem seypêyîya komelî hem zî naskerdişê heqanê sîyasî, komelî, ekonomîk, çandî û mirovî yê her kesî bigîro.

	 

	Ciwîyayîş komelêka seypê û hemsengî de, no manê dano ke tu kes mecbûr nêbo ke heqê xo yê çandî ya zî nasnameya xo ra fek bidero û tu kes bi zorî nasnameyêka bîne de asîmîle nêbo. Seba aştîyêka domdare û rewa, şertêko muhîm o ke yewbînî ra bawerkerdişê her di hetan û seypêyîya erk û heqan, komelêka ke edalet tede serdest a de, Qanûnê Esasî de bi xurtî bêrê cayîkerdene û caardişê êy rê garantî bêro girewtene.

	 

	PENa Mîyanneteweyî û Navenda PENa Kurdî bi tundî wazenê ke hemû nuştox, rojnameger û hepsîyê sîyasî bi lez û bêşert azad bêrê kerdene. Heta ke raman kesê rexnegir û nuştox pey beranê hesinî de bê, tu dest pêkerdişê aştîye nêşeno bawerîya exlaqî ya zî demokratîk bigîro.

	 

	Sey nuştox û nimayendeyanê PENî, ma bi xurtî bawer kenê ke edebîyat û çand parçeyê bingeyînê awankerdişê aştîye yê. Ma soz danê ke tu rey qelemanê xo nêkerê xizmetê pêkewtişî, kînî û şovenîzmî, labelê qelemanê xo bi biryardarî seba raştîye, edaletî û yewbînî qebûlkerdişê gerdûnî yê mirovayîye bixebitnê.

	 

	Konferans, bi piştîya xurta yewîya pêroyî ya PENa Mîyanneteweyî, rayedaran û serekanê sîyasî yê dewleta Tirkîya rê vengdayîş keno ke rûyê xo diyalogêkî ya biserûber, zafrenge û zerrî ra bidê, ya ke seypêyî û serdestîya destûrî ser o ame awankerdene. Ma hema zî hemû çalakvanê komela sivîl rê vengdayîş kenê ke bi cesaret û nêrînêko kûr û dûrbîn, cehdanê awankerdişê aştîyêka raştikên, destûrî û domdare pêro de beşdar bibê.”