'Doza Zarrabî temsîlîyetê tengbîyayîşê Tirkîyaye ya'

2017-11-28 13:11:53


	 

	DÊRSIM- Beycan Taşkirane dîyar kerde badê doza Reza Zarrabî skandalê bêusilî û rişwetî vejîyayî raste. Beycane qiseykerdişê xo de bale ant doza Zarrabî ser û va; Doza Zarrabî ra dîyar beno ke Tirkîya mabenê dewletanê hegemonîk de menda. Ma destur nêdanê bêusilî û bazarîyan. Ma do seba ameyoxêka azad têkoşîn bidî meşnayiş.

	 

	Reza Zarrab 19ê adara 2016î ra heta nika tewqîfkerde yo. Zarrab bi sucanê bi hawayo bêqanunî kerdişanê ABDyî ke Îranî ser o kerdbî qule dekerdo, komeleyê ABDyî xapênayo û bi hawayo bêusilî pere dizînayo, yeno sucdarkerdiş. Zarrabo ke mabenê ci AKP û Erdoganî reyde baş bî, yeno îdiakerdiş ke heme sucdarkerdişan qebul kerdo û sucê xo îtiraf kerdo. Wina eseno ke AKP û Tayyîp Erdoganî zî dosyaya Zarrabî ra dima kewtî tengê.

	 

	Babete ser o Endama MYKyî ya Partîya Demokratîke ya Şaran (HDP) Beycan Taşkirane qisey kerde û dîyar kerde ke Tirkîya NATOyî ra nêqerifîyen.

	 

	Tirkîya xitimîyayişan cuyena

	 

	Beycane destpêkê qiseykerdişê xo de va ‘pêvînayişê ke Rusya û Şangayî reyde yenê kerdiş do seba kesê bindest, feqîr û kedkaran zilm bîaro’ û wina dewam kerde: “Tirkîya xetimîya ya. Sebebê xetimîyayişê Tirkîya doz û dosyaya Zerrabî ya. Tirkîya hetê ekonomî, polîtîk û komelî de xitimîyayişan cuyena. Tirkîya ameya merheleya teqîyayiş û vêşanî. Seba ke hetta serra 2019î rejîmê yewkesî awan bikerî, hêrişê şaran û kedkaran kenê.”

	 

	Sere de piştî dayî Zarrabî

	 

	Beycane dewamê qiseykerdişê xo de dîyar kerde ke cayêko tede munaqaşayê herêm û netewe bibî, ewja de hêzê sermayegozar, serdestî û xeylê çîyê nimite estî û wina domnaye: “Hewldayişê azadîya şaran zî na çarçewe de yena nimitiş. Kedkarî feqîrî reyde rî bi rî yî. Kesê ke sere de piştî dayêne Zarrabî, badê îdiayê qebulkerdişê sucan, fek ci re vera dayî. No zî tersê keyeyê Erdoganî ra pê yeno. Sey heme hêzê serdest, ABD zî wazeno ke na rewşe ra feyde bigîro û têkilîyê hegemonîk awan bikero.”