Cinîyê ke nêeşkenê vejyê zozanan: Dewlete her vaşî zî qedexe kerde 

2018-04-12 09:28:53


	 

	COLEMÊRG - Seba qedexe û qerekolê ke ameyê viraştiş heywanê ke nêvejênê zozanan ya mirenê ya zî yenê rotiş. Cinîyê Geverî dîyar kerdî ke her serre aşma Nîsan û Gulane de zozanan de vaş kom kerdêne la emsar nêeşkenê vaş zî kom bikerê û vatî dewlete komkerdişê vaşî zî qedexe kerda.

	 

	Colemêrg de binê nameyê 'Mintiqaya Asayîşê Taybet de' qedexekerdişê zozanan yewin çimeyê debara şarê mintiqa ardo merheleya çinbîyayîşî. Şar seba qedexeyan bi di serrî yo dewam keno, hewl danê ke qeza ya zî bajaran de heywananê xo  cayê zergûn de biçernê. Warê ke ameyê qedexekerdiş  qerekol ameyê awankerdiş û ê ke vejênê zozanan zî eynî roje de mecbur manenê ageyrê keyeyê xo. Cinîyê ke Kadikoyê Geverî de cuyenê debara xo bi pes kenê, dîyar kerdî ke vaş zî ameyo qedexekerdiş.

	 

	'Ma mecbur manenê pes biroşê'

	 

	Saîme Aktaşe da zanayîş ke ê pesê xo nêeşkenê mird biçernê û no semed ra mecbur manenê biroşê û wina va: "Bi di serrî yo ma pesê xo nêeşkenê berê zozanan. Seba ke ma baş nêeşkenê biçernê ma mecbur manenê biroşê. Yewin çimeyê debara ma heywanî bî. Qedexe dest pêkerdî ma nêzanê se bikerê. Verê ma çend hewte zozanan de mendêne. Nika ma vejênê zî ma eynî roje de ageyrenê. Semedo ke her ca de qereqol ameyê awankerdiş. Her serre ma aşma Nîsane û Gulane de şîne zozanan. Ma vaş kom kerdêne. Emsar ma nêeşkenê wina zî bikerê. Dewlete komkerdişê vaşî zî qedexe kerda.

	 

	'Her ca de qereqole'

	 

	Hanim Altune zî da zanayîş ke aye gorey 100 pesê xo mecbur menda biroşo û wva: "Semedo ke baş nêçêrenê ma şitê înan ra baş feyde nêgînê. Bi di serrî ma nêeşkenê şêrê zozanan. Her ca bîyo qereqol. Ganî qedexeyî wirzê."

	 

	Hacer Kirdage zî va 200 pesê aye ra 40 hebî mendê û wina va: "Seba ke şitê înan yeno birnayîş. Hîn xo ver merdî. Ma hewteyan zozanan de mendêne û ma pesê xo çêrnayne. Şitê înan zaf baş bi. Nika ez pesê xo baxçeyê xo de çêrnena. Qedexeyan zirarêke pîl da ma."