Dadgehe seba îstîsmaro zayendî 15 serrî da, serek şerh da ro: Delîl çin o 

2018-04-14 13:36:24


	 

	Safîye Alagaş

	 

	AMED - Hetê 2yîn Dadgeha Cezaya Giran ya Amedî ra seba gumanbarê îstîsmaro zayendî 15 serrî cezaya hepsî amî dayîş. Serekê dadgehe şerh da ro û vejya meydan ke îstîsmaro zayendî delîlêke bi bawerî ameyê waştiş.

	 

	Amed de Çeleyê 2012 de domana 15 serrî şî verê polîs û va hetê kesêke ke taxe ra vanê 'xalo' bi zor rastê îstîsmaro zayendî ameya. Domane va bi pawitişê cewherî Azîz O ra xilas bîya û domane Azîz O. fotograf ra teşîs kerde. Çarçeweya cigêrayîşî de hetê Serdozgerîya Komara ya Amedî ra ameyo destpêkerdiş de derheqê Azîz O. de qerarê tepiştişî ame dayîş. Îdianameyê 11 Çele 2013 de ameyo amadekerdiş hetê 2yîn Dadgeha Giran ya Amedî ra amî qebulkerdiş.

	 

	Domane te dir ardî têhet

	 

	Azîz O dadgehe de îfade de ke domane nas nêkeno û sucdarî red kerd. Azîz waşt ke bi domane dir bêro rî bi rî û dadgehe 17ê teşrîna peyêne 2014 de domane dir ard vera yewbînan. Domane teşîsê newe de îdia kerde ke aye Azîz O teşîs nêkerdo û kesê ke aye remnayo bi amancê çalakîya zayendî nêremnayo.

	 

	Dadgehe dîyar kerde ke gumanbar waşto raste rast îstîsmaro zayendî bikero û sucê 'îstîsmaro zayendî yê domane' 6 serrî ceza dayê û nê zêde kerdî û vetî 12 serran. Azîz O pêroyî de 18 serrî ceza girewt û 'kewtişê takdîrî’ vistî 15 serran. La derheqê gumanbar de qerarê tepiştişî nêame dayîş.

	 

	Bi zafvengîyê serekê dadgeha şerha muxalefetî da.