Dewijê ke hemverê DEDAŞî têkoşîn kenê: No zî polîtîkayêke koçberî yo 

2018-04-16 12:43:20


	 

	MÊRDÎN - Ekîbê DEDAŞî ke Mêrdînî ceyran birnay û şarî mexdur kerdî, seba deyn bêro dayîş û çimeyê awe zî pere bibirnê dewan geyrenê û îmzayan kom kenê. Hemwelatî dîyar kerdêne ke seba dewan veng bikerê wina kenê.

	 

	Qezaya Dêrik, Qoser, Nisêbîn û Artuklu yê Mêrdînî hetê DEDAŞî ra bi sebebê 'ceyran kaçax kerdê û faturey nêdayê' ceyranê 280 dewan ame birnayîş. Dewijî 11 rojan bê ceyran û awe mendî. Nê rojan DEDAŞ reyna dewan de geyreno û seba deynî bêrê dayîş û awê çimeyî zî girêdayê pere bikerê îmzan wazenê. Bajarê ke hîna tayê dewî bê awe û ceyran ê, endîşeyê citkaran zî dewam keno.

	 

	Rojê vîyarte de ekîbê DEDAŞî dewa Başakê Qoserî de rastê xoverdayîşî ameyî û dewijan çalakîya roniştişî kerdî, cendirme ameyî dewe û gazê îsotî eştî û 6 kesî birîndar bî.

	 

	'Ceyranê kesê nêzdîyê xo nêbirnenê'

	 

	Cinîya bi nameyê Zerga Tezdumana bi gazê îsotî û guleyê gazê TOMA ra ame eştiş ra birîndar bî, dîyar kerde ke aye raporê derbî girewta û gerre kerda û wina va: "Semedê ceyran ame birnayîş heme çî ma xira bi û ma nêeşkayî biewnê heywananê xo ra. Ceyranê kesê nêzdîyê xo nêbirnay. Cîranê ma yê Sûrîye zî estê înan zî zaf zehmetî ant. Werdê înan xira bîne. Reyan ceyranê ma ameyne. Hewceyê înan zî bi no hawa ardêne ca. Wextê ke ceyran çinbo ma tenuran de viraştêne. Ma werd zî hewşe de serê adir de viraştêne."

	 

	'Ma tena heqê xo wazenê'

	 

	Zergaye roja ke birîndar bî zî wina va: "Lajê birayê mi girewtî mîyanê xo dayî piro. Linge kêna mi mor bîbî. Eme mi birîndar bî. Cêrîye mi serê hişê xo ra şî. Mi nêweşxane ra rapor girewt. Ez seba birîne hîna eşkena milê xo berî û bîyarî. Mi gerre kerd la ceza bidê nêdê ez nêzana. Wazenê dewan de ramitiş çin bikerê. Wazenê dewan veng bikerê. La heta ma estbi ma tîya ra nêşinê."