'Berardişê şaş û îlacê kîmyayî herre qels kenê'  

2018-04-16 13:39:10


	 

	Duygu Cînîvîz/Rojda Aydin

	 

	AMED - Şîrîn Gul Dalkuşe herre sey ‘agernayîşê xoza' bi name kerde û va îlacê kîmyayî herre qels keno û na babete de îqaz kerde.

	 

	Şîrîn Gul Dalkuşe ke qezaya Amedî Farqîn de ramitişê organîkê kargeh akerda û hedef kena ke herre kîmyayî pak bikero û dewlemendîya herre newe ra zêde bikero. Şîrîne eleqeyê xo yê bi xoza dir bi vatişê sey ‘Ageryayîşê merdiman ê xoza, ageryayîşê sîstemê ekolojîk’ qalî kerde û dîyar kerde ke bi hişmendîyê ekolojîk dir wexto ke herre û nebat bêrê têhet, kêfweşî danê merdiman.

	 

	'Herre bi maddeyê kîmyewî fetisya'

	 

	Şîrîne ard ziwan ke metodê kîmyewî îlackerdişê herre dewlemendîya herre kêm keno û wina va: "Wexto ke herre bi îlaci kîmyewî bêro îlackerdiş do organîk nêbo. No het ra dewlete berardişê organîk teşwîk nêkena. Bi serran o dewlete derheqê berardişê kîmyayî de teşwîq kerde û no zî herre fetisnayo."

	 

	'Ramitişê organîk toxim ra dest pêkeno'

	 

	 Şîrîne dewam de da zanayîş ke berardişê organîk herre xurt keno û wina va: "Organîkbîyyaîş fêdeyê ci wina yo : Toximê ke şima erzenê heta yeno serê siferyê şima xelekek esto. Na rewşe hetê Ewropa ra zaf vilakerde bo zî tirkîya de mintiqayê pîlot dest pêkenê. Agirî, Wan û Dêrsim sey mintiqayê pîlot yenê destgirewtiş. Teşwîkê ramitişê organîk yeno kerdiş. Gerek berardiş zî toximê organîk bê destpêkerdiş û heme merheleyê ci wina dewam bikerê. Merdimî bi madeyê kîmyayî nêeşkenê biresê cayêke. Pêwa heme astengîyan ez do têkoşînê xo dewam bikerî."