Hepisxaneyê Xarpêtî de îşkenceyê zayendî 

2018-04-19 13:41:42


	 

	XARPÊT - Hepisxaneyê Tîpê T yê Xarpêtî ame zanayîş ke cinîya hepsî hemverê îşkenceyê cigêrayîşê viran de xo ver daya, ameya derbkerdiş û rastê îşkenceyê zayendî ameya. Hepsî wazenê heyetêke xoser şêro hepisxane ke îhlalkerdişê heqan qewimyeno.

	 

	Hepisxaneyê Tîpa T yê Xarpêtî ke roja ke ameyo akerdiş heta nika sey 'hepisxaneyê mintiqa' yeno binamekerdiş û her wext rojeve de yo, caardişê kêfî dewam kenê. Tewr peynî ame zanayîş ke 120 kesî kerdê hucreyan û hewteyêke verê zî cinîyêke Riha ra surgunî uca ameya kerdiş, seba hemverê îşkenceyê cigêrayîşê viran xo ver daya, rastê îşkenceyê zayendî ameya û derheqê aye de zabitname ameyo girewtiş.

	 

	Hepsîyan rê 'hûmartişê leşkerî' yeno ferzkerdiş

	 

	Hepisxaneyê ke hûmartişê leşkerî yeno ferzkerdiş, caardişê cilê yewreng zî ardê û hepsîyê ke vejênê teber zî her wext rastê heqaretê gardîyanan yenê. Hepsîyê ke hûmartişê leşkerî piştgoş kenê zî rastê îşkence yenê û derheqê înan de bi desan cezayê dîsîplînî yenê dayîş.

	 

	Hepsîya cinî rê îşkenceyê zayendî!

	 

	Ame zanayîş ke hepsîya ke Riha ra surgunê Hepisxaneyê Tîpê T yê Xarpêtî ameya kerdiş cigêrayîşê viran serê aye de ameyo ferzkerdiş û seba ke xo ver daya rastê îşkenceyê zayendî yê gardîyanan ameya. Dimayê îşkence derheqê aye de zî bi îdiaya 'hemverê cigêrayîşî xo ver daya' zabitname ameyo girewtiş û dima ra berdê koxuşe. Goreyê zanayîşê keyeyê ke şinê pêvînayîş, hewteyê vernê nivînan nêdanê hepsîyê ke newe yenê û hewteyêke dima ra zî nivînê lêşin danê.

	 

	'Tîya Xarpêt o tîya de Kurdî qedexe ya'

	 

	Heto bîn ra keyeyan va ke hepsîyê ke wextê surgunan de Kurdî qisey kerdê zî rastê vatişê gardîyanan yê sey 'Tîya Xarpêt o, tîya de Kurdî qedexe ya' ameyê û rastê cezaya dîsîplînî yenê.

	 

	'Ganî bilezgînî heyet bêro'

	 

	Tewr peynî keyeyan veng da raya pêroyî ke hemverê nê caardişan bêveng nêmanê û ganî heyetê xoser şêrê hepisxane.