Keyeyî seba domanê ke bi nêweşîya SSPE yê dermankerdişê hucreyê kokî wazenê 

2018-04-20 11:24:07


	 

	ŞIRNEX - Şirnex de wextê peyînan de nêweşîya SSPE reyna yena vînayîş û keyeyî seba domanê serê serrê  2000î de ameyê dinya endîşeyîn ê. No semed ra dermankerdişê hucreyê kokî wazenê.

	 

	Bi taybet bajarê Kurdan de domanê ke 2000î de ameyê dinya nêweşîya Subakut Sklerozan Panensefalîst (SSPE) yena vînayîş û wextê peyînan de bi seyan domanan dir yena vînayîş. Keyeyê Şirnexijî îdia kenê ke sebebê na nêweşîye ‘aşîya bayat’ ke hetê nêweşxaneyan ra serrê 2000î de domanan rê ameya pirodayîş a û semedo ke nêweşî Kurdistan de zêde yena vînayîş, na netîce vejêna meydan. Mintiqa de seba na nêweşîye zî vanê ‘Nêweşîya Kurd’. Emel Kirmizigula Cizîrê Şirnexî de cuyena kêna aye Munevvere (18) bi na nêweşîye kewta wazena ke seba dermankerdişê aye, dermankerdişê hucreyê kok bêro kerdiş û seba nê veng da.

	 

	'Kêna mi hîrê aşman de hişê xo vinî kerde'

	 

	Emele da zanayîş ke birarkêna aye 10 serrî verê wexto 8 serrî bîya na nêweşîye ra cuya xo vinî kerda û va hur di zî serra 2000 de ameyê dinya. Emele dewam de nê çî vatî: "Kêna mi 6ê Teşrîna Peyêne 2017 de hewale derbaz kerde. Nêweşxaneyê tîya va Epîlepsî yo. Dima ra ma berde Mêrsîn û vatî nêweşîya SSPE ya. Vatî sebebê ci aşîyê bayat ê. Ma berde Enqere zî. Înan zî eynî çî va. Ma ameyî keye di aşman derman xebitnayê. La vatî no derman  nêweşî nêqedêneno û tena hîn mîyanê nivînan de verdeno. Pêwa xebitnayîşê dermanî aşma hîrên de hişê xo vinî kerde, çimê aye nêdî û nêeşkena qisey bikero. Bi zor rayîra şina. Bê ma nêeşkena rayîra şêro. Ma nas nêkena."

	 

	Emele peynîya qiseykerdişê xo de da zanayîş ke kêna aye zaf serkewte bîya û va çimmê her ke şinê nêvînenê û seba dermankerdişê kêna xo vengdayîşê dermankerdişê hucreyê kokî kerde.

	 

	'Nêweşî tena Kurdistan ra yenê'

	 

	Xale Munevvere, Sebahat Doganere zî da zanayîş ke bi seyan keyeyî bendeyê dermankerdişê hucreyê kokî yê û wina va: "Nê dermankerdişê merdiman hetê ekonomî û  manewî de qedêneno. Munevvere verê eşkayne heme çî xo bikero la nika nêeşkena wirzo serê lingan. Verê zî ma birarkêna xo vindî kerde. Ma nêwezenê domanê ma verê çimanê ma de bihelîyê. Dêrsîm ra heta Cizîre bi seyan domanî na nêweşîye kewtê. Goreyê doktoran bajarê Tirkîya de tu nêweşê wina nînê verê înan. Heme Kurdistan ra şinê. Şirnex de 34 domanî na nêweşîye kewtê û 10 hebî zî cuya xo vinî kerdê. Serrê 2000 de aşîyê bayat dayî domananê ma ro. Ma seba domanê xo yê a serre de ameyê dinya endîşeyîn ê. Ma vanê çîyêk nêro sereyê înan. A serran de zaf ceyran şîne. Dermanê nêweşxaneyan zî xira benê. Kes seba dermankerdişê na nêweşîye çîyêk nêkeno. Ya babeta vatişî ya, cuya domananê ma ya. Ma nêwazenê domanê ma bimrê.