'Derdê şarî debare, yê înan zî weçînayîş o' 

2018-04-21 09:39:45


	 

	Gulîstan Azak

	 

	MELETÎ - Meletî de hemwelatîyê reaksîyon hemverê reya 7in dergkerdişê OHALî û qerarê weçînayîşî rew de vatî: "Derdê şarî debara înan zî weçînayîş o. Gelo se bi ke şima temehumêlê rojêke bê OHAL nêkenê?"

	 

	Heyetê Pêroyî yê TBMMî seba OHAL reyan 7in bêro dergkerdiş, pêvînayîşê derheqê tezkere de dewam kenê û serekê Pêroyî yê AKPî Tayîp Erdogan û Devlet Bahçelî yê MHPî zî dimayê zîrveyê weçînayîşê nîm saete de dîyar kerdî ke do weçînayîş 24ê Hezîrane de virazyo. Dimayê îzahatê weçînayîşê rew dima OHALî reya 7in ame dergkerdiş. Cinîyê Meletî hem weçînayîşî û hem zî dergkerdişê OHALî şîrove kerdî.

	 

	Elîf Guneşe dîyar kerde ke şar weçînayîşêke newe yeno ferzkerdiş û va her wext hewayê weçînayîşî de cuwîyayîş yeno dewamkerdiş û va: "Bi weçînayîşo ke ameyo îlankerdiş de îradeyê şarî ameyo çinkerdiş. Kes şar nêfikrêno. Derdê ma debare yo û înan zî weçînayîş o. Şarê ke nêeşkeno peynîye aşme bîyaro, mîyanê deyn de xetimyayê. Ciwanê ma yê wendê zî betal ê."

	 

	'Reyna weçînayîş reyna OHAL'

	 

	Bahar Çakila zî va 16ê Nîsane de zî seba reformê Desturê Bingehîn binê OHALî de şîyê serê sindoqan û va: "Tirkîya de binê OHALî de weçînayîş yeno ferzkerdiş. Şertê OHALî de nêeşkenê weçînayîşêke baş bêro kerdiş. Tirkîya bi di serrî yo OHAL û KHKyan yena îdarekerdiş. Hetê hukmatî ra heme muxalîfî hedef yenê girewtiş. Xeylê wendekarê unîversîte ameyî tepiştiş. Ciwanê ma hepisxaneyî de yê. Ganî hukmat êdî peynî OHAL û tepişnaye bîyaro."

	 

	'Gelo se bi şima nêeşkenê bê OHAL bicuwîyê?'

	 

	Gul Tanişe zî dîyar kerde ke yê ameyê îqtîdar her wext eynî çekû awan kerdê û no semed ra zî bawerîya ma bi demokrasî qedîyaya. Gule veng da serekomarî ke va gelo se bîyo şima tehemulê rojêke bê OHAL nêkenê.

	 

	'Bi OHALî dir merdimî nêeşkenê şêrê weçînayîş'

	 

	Zelal Taşkine zî wina va: "Gelo rastîyê binê îlankerdişê weçînayîşê rew de çîyo? Ma meraq kenê. Eke hukmatêke na babete de qerar gênê, o wext welat çîyêke rayîr de nêşinê estê. Wa êdî dest xapênayîş vera bidê."

	 

	Selma Çoşere zî da zanayîş ke weçînayîşî rastê îmtîhanî unîversîte yenê û no zî stresê wendekaran tewr zêde keno û va: "Kes domanan nêfikrîyeno. Xora seba sîstemê perwerde psîkolojîyê domanan xira bîyo."