Domanê ke zanayîşê înan 23ê Nîsane ra çin o: Ma wazenê ageyrê serê herre xo 

2018-04-23 09:14:17


	 

	AMED - Tirkîya de rewşa domanê xebatkaran her ke şino xira beno. Bi hezaran domanê xebityenê zanayîşê înan 23ê Nîsane ra çin o û nê domanan ra zî Yasîn û Necîp yê Heleb ra yê. Yasîn û Necîp waştişê înan o yo ke şer peynî bibo û ageyrê serê herre xo.

	 

	Dinya, Tirkîya û Kurdistan de îstîsmarê domanan, karkerîya domanan û kiştişê domanan dewam kenê û sazgehê mîyanneteweyî hemverê nê caardişanê serê domanan bêvengê. Dinya de û xeylê welatan de derheqê domanan de peymanî yenê îmzakerdiş la tena bi îmzayan nêmanenê. Welatê îmza eştê zî tena dayeyê derheqê şert û mercê domanan de eşkera kenê. Tirkîya û Kurdistan zî sey ke şert û mercê domanan zaf baş o, welatê bînan ê multecî yenê girewtiş û nê şertê nêbaş de bandurêke pîl serê domanan de kerd. 

	 

	Karkerîya domanan zêde bena

	 

	Karkerîya domanan roj bi roje zêde bena û hedîseyê îstîsmarî zî zêde benê. Seba domanan alternatîf nînê pêşnîyarkerdiş û gumanbarê îstîsmarî zî hetê hukmî ra yenê pawitiş û veradayîş. Kuçe de ma geyrenê û domanê Heleb ra Yasîn (14) û Necîp (16) vînenê. Yasîn bi erebokê çopî, poşetan kom keno. Yasîn zî Heleb ra ameyo û erebî qisey keno, la qasê ke xo îfade bikero Tirkî qisey keno. Yasîn senîn ma vîneno şino park de nişneno ro û ma zî pey ey de şinê.

	 

	'Ez wazena ageyrî rojê verê'

	 

	Ma 23ê Nîsane Yasînî ra pers kenê û Yasîn vano zanayîşê ey a roje ra çin o û wina vano: "Ez Heleb ra ameya. Seba ke ma binê bomban de nêmanê, ma ameyî tîya. Pîyê mi merd. Maya mi Dîlok de ya û ez û birayê xo tîyayê. Ez poşet û naylonan kom kena û ma pê debara xo kenê. Ez wazena ageyrî serê herre xo. Senîn şer biqedîyo ma do şêrê."

	 

	'Ez wazena şîrî Heleb'

	 

	Ma Necîpo ke verê Yasîn de yo qisey kenê û wina vanê: "Ez Heleb de nêxebityayne. Şîne mektebe. Senîn şer destpêkerd ma bi keyeyî ameyî Amed. Ma 11 kesê. Mi waştêne Heleb de bibayne. Senîn şer biqedîyo ma do şêrê serê herre xo."

	 

	Wezîra Asayîşê Komelî û Xebate Julîde Sarioglu 'Merasîmê Îmzayê Deklerasyonê Têkoşînê bi Karkerîya Domanan dir' îlan kerdibî ke Serra 2018an 'Serra Têkoşînê Hemverê Karkerîya Domanan' îlan kerdê. Julîde dîyar kerdebî wezaret na babete de hemleyê girîng eştê û polîtîkayê bi biryar ca ardê. Julîde vatibî hêzê tewr pîl ê xebate do Emîne Erdogan bigîrê û do hetkarîya aye destê xo bidê heme domanê Tirkîya û cografyayê bînî.

	 

	Julîdeya ke va do destê xo bidê domanê cografyayê bîn, behsê domanê ke serê herre înan de ameyê qetilkerdiş Ceylan Onkul, Ugur Kaymaz, Mîray, Cemîle û Helîne nêkerde.