Cinî xo seba 1 Gulane amade kenê: WExtê ma yê ma vinî bikerê çin o 

2018-04-24 13:14:00


	 

	ENQERE - Cinîyan dîyar kerde ke hemverê şîdetî, şer, teda û bêtêduştî yê zayendî do vengê xo 1ê Gulane de reyke bîn zî berz bikerê û wina va: "Êdî wextê ma yê ma vinî bikerê nêmendo. Ma mecburê têhet de bê û bibê wayîrê hêz."

	 

	Cinîyê ke rastê her tewir tedayê cîyîyî yenê bi OHALî dir KHK yê ke ameyî vetiş, bi îxracan dir rast ameyî. Cinî do hemverê teda û tarîtîyê OHALî do 1ê Gulane de zî waran de bê û verê heme çî do azadî biqîrê. Cinîyê Enqereyijî dîyar kerdî ke verê heme çî gerek cinî bibê yew û warê 1ê Gulane pir bikerê.

	 

	Torra Piştdayîşê Cinîyan ê Narî Pelîn Bektaşe da zanayîş ke her şert û mercî de waştişê cinîyan azadîya û wina va: "Îqtîdarê AKPî Tirkîya bê nefes verdaya. Polîtîkayê hemverê cinîyan zêde benê. Seba ma tewr girîng azadî ya. Ewro seba cinî bieşkê bicuwîyê lazimî azadî esta."

	 

	'No têkoşînê ma hemine yo'

	 

	Pelîne qiseykerdişê xo wina dewam kerde: "AKPî sere de xeylê het ra azadîya cinîyan destê înan ra girewta. Ma seba reyna azadîya xo bigîrê têkoşîn kenê. Ma sey cinî seba ke wayîrê keda xo vejîyê ma do 1ê Gulane de waran de bê. Ma seba hêvî girs bikerê têkoşîn kenê. No têkoşînê ma hemine yo."

	 

	'Ma hemverê sîstemê kapîtalîst do waran de bê' 

	 

	Sekretera Cinîyan ê Hûmara 1ê Egîtîm Senî Canan Çalagane zî da zanayîş ke bi serran o kapîtalîzm keda cinîyan pelçiqneno û hemverê ci zî cinîyan her warî de têkoşîn kerdê û wina va: "No prosesî de manayêke bîn yê 1ê Gulane esto. Semedo ke ma hetê AKPî ra bê perskerdiş kar ra ameyî eştiş û keda ma amî xespkerdiş. Ma sey cinî hemverê kapîtalîzmî de ma do 1ê Gulane de waran de bê û ma do serkewte bê."

	 

	''Wextê ma ê vinî kerdişî çin o' 

	 

	Endama Partîya Karkerê Sosyalîstê Tirkîya (TSÎP) Ayşe Kayguzuze dîyar kerde ke do 1ê Gulane de hemverê teda û zordarî vejîyê meydanan û va êdî wextê înan ke vinî bikerê nêmendo û veng da ke heme cinî biherêkê meydanan.