Berpirsîyarê qirkerdişî û heme kesê înan pawenê wa bêrê cezakerdiş 

2018-05-15 12:25:30


	 

	MANÎSA - Cinîyan dîyar kerdî ke ganî berpirsîyarê qirkerdişê Soma û her kesê ke înan pawenê bêrê cezakerdiş û sîstemê ke karkeran sey kole vînenê nêwazenê.

	 

	Cinîyê ke ameybî vîrradişê qirkerdişê Somayî waştî ke ganî cînayetê kar peynî bibê û vatî ê her serre beşdarê vîrardişî benê û seba vernî kiştişê kar bêrê girewtiş eke Dewaya Somayî de cezayê girîng nêrê dayîş do heta DMME şêrê. Cinîyan ard ziwan ke her roje kiştişê karkeran yenê cuwîyayîş û ganî ferasetê ke karkeran sey kole vînenê bêrê vurnayîş.

	 

	'Ganî heme pawitoxî bêrê cezakerdiş'

	 

	Wayîke Bîlal Malkoço ke şehîdê madenî yo, Ayşenur Kuzu da zanayîş ke ê do fek 301 ganan vera nêdê û wina va: "Kiştoxî çiqas ceza zêde bigîrê ma do hende rehet bê. Ma averşîyayîşê dadgehe baş nêvînenê. Bi 4 serrî yo ma zanê ma çi ancenê. Wa selahîyetdarê dewlete xo bikerê vara ma. Domanê înan zî estê. NA dewa pozîtîf netîce nêba ma do heta Ewropa şêrê."

	 

	Rezzan Ozaye zî da zanayîş ke Soma de qirkerdişê karî ameyo cuwîyayîş û eke tedbîrê lazim bi ameyne girewtiş 301 kesî nêmerdêne û wina va: "Girîngî danê maden û qezenckerdişê pereyan. Eke tedbîr biameyne girewtiş ê merdimî xelas bibayne. Na hedîseya bi dej nêameyne cuwîyayîş. Dewaya Soma seba huqûq, edalet girîng a. Cayê ke huqûq û edalet çinbê cuya merdiman kona xeter. Karkerî sey kole xebityenê û hîrê quruşî qezenç nêkenê. Krîzê ekonomî xora esto."

	 

	'Komirê tîya ciwal ciwal roşenê'

	 

	Hîkmet Îşbîlîre zî ard ziwan ke aye 50 serrî ya û va êdî seba xo nê seba dinyake baş wazena û wina dewam kerde: "Ma fek nê ra vera bidê do ameyoxê ma destê ma ra bêro girewtiş. Komirê tîya bi ciwalan vila kenê. Heme seba propagandaya weçînayîşî ya."

	 

	'Her roje karker mirenê'

	 

	Sultan Yilmaze zî da zanayîş ke tena Soma  de nê her ca de karkerî mirenê û qiseykerdişê xo wina qedêna: "Seba Somayî 301 kes merde ameyî vînayîş. Her roje karkerî mirenê. Sey koleyan vînenê. Ma seba nê bîyarê xo vîr tîyay. Ma tena seba hedîseyê Soma nê heme kiştoxê kar yê Tirkîya tîyayê."