Domano ke bê pî ame dinya: Muhammed Xelîl 

2018-06-01 14:21:36


	 

	ŞEHBA - Netîceyê hêrişanê dewleta tirk û komê girêdayeyê ci yê vera Efrînî de bi hezaran kesî koçber bîyî, ameyî qetilkerdiş û xeylê domanî sêwir mendî. Domano binameyê Muhammed Xelîlî zî nê domanan ra yew o. Xelîlî netîceyê hêrişanê tanq, top û teyarayan yê dewleta tirkî de bê pî amey dinya.

	
		 


	Dewleta tirk û bi desan rêxistinê çeteyan bi tanq, top, teyara û sîlehanê teknolojîkan hêrişê Efrînî kerdî. Vera înan de şerwanê YPG û YPJyî xoverdayîşêko tarîxî nîşan dayî. Bi hezaran koçberî pêroyê Surîye ra hêrişê rejîm û komê çeteyan ver herra xo ra koçî kerdî. 

	 

	Netîceyê hêrişanê dewleta tirk û çeteyanê girêdayeyê ci de heta nika bi seyan sîvîlî ameyî qetilkerdiş, bi hezaran hemwelatîyî zî koçê Kantona Şehba kerdî û bi hezaran domanî zî sêwir mendî. Nê domanan ra yew zî Muhammed Xelîlî yo. Xelîlî netîceyê hêrişanê tanq, top û teyarayanê dewleta tirkî de bê pî amey dinya.

	 

	'Ganî dinya de heqê domanan bêro pawitiş'

	 

	Babete ser o dayika Muhammedî, Mehasên Xelîke qisey kerde û dîyar kerde ke domanê aye vera çimê heme dinya de sêwir mend Mehasêne qiseykerdişê xo de wina va: “Ganî hesapê wehşîtîya dewleta tirkî bêro perskerdiş. Ganî Erdoganî ra hesabê domanê ke bê pî dayik mendî bêrî perskerdiş. Ma do qetî Erdogan û hetgiranê ci efu nêkî û xo vîra nêkerî. Ganî heme dinya de heqê domanan bêro pawitiş û Erdogan bî sebebê mergê dayik û pîyê domanan. Erdogan qatilê domanan o."

	 

	'Hêzê mîyanneteweyî qatilê domanan ê'

	 

	Mehasêne dewamê qiseykerdişê xo de wina va: “Her çend ke şert û mercê kapman zehmetin bibî zî ma Kampa Şehbaye de xover danî. Hêzê mîyanneteweyî yê ke hertim qala heqê domanan kenî, qatilê domanan î. Çimkî qetilbîyayîşê domanan temaşe kerdî û vengê xo nêvetî. Kesê bêveng hemkarê Erdoganî yî. Qatilê cinî, doman, pî û dayikan keyeyê efrînîjan mabenê xo de pare kenî. nê çîyan rê zî bengê xo nêkenî. Ma nêwazenî doman bê pî û dayik bimanî. Heta peyni ma do xover bıdi.”