Amed ra vengdayîşê cinîyan: Wexto ke şima şî serê sindoqan reyke bîn zî bifikrîyê 

2018-06-04 09:46:52


	 

	AMED - Cinîyê Amedî dîyar kerdî ke heta tecrîdê serê Rayberê PKKî Abdullah Ocalanî nêwirzo do şarê Kurd azad nêbo û wexto ke şinê serê sindoqan ganî bifikrîyê.

	Xebatê weçînayîşê yê partîyê sîyasî bêmabên dewam kenê û cinîyan dîyar kerdî ke do hesabê Sûr, Cizîr û Nisêbînî 24ê Hezîrane de piştdayîşê HDPî bikerê. Cinîyan va vera zulmê îqtîdarî ke bi serran o dewam keno, yewîye û seba azadbîyayîşê şaran zî ganî Rayberê PKKî Abdullah Ocalan bireso azadîya xo.

	'Komara Tirkîya nîya, komara Tayyîbî ya'

	Safîye Sezgîne zî reaksîyonê xo wina arde ziwan: "Na komara Tirkîya nîya, komara Tayyîbî ya. Seba xîle nêrê kerdiş, ganî ma asayîşê sindoqan bigîrê. Êdî do zulm peynî bibo. Bi pere êdî nêeşkenê şarî bixapênê. Erdogan kam ci kerra wedarno, do bin ra Kurdî vejyê."

	Hanîfe Ozkiliçe zî bale ante serê zulmê serê şarê Kurd û wina va: "Şar seba bibo yew û wayîrê herra xo vejyê ganî vejyê meydanan. Ewro roja yewî û têduştî ya. Ciwan, kal û pîr ferq nêkenê. Wa tu kes xo seba pere nêroşo."

	Hamdîye Çetîne zî da zanayîş ke ganî Kurdî şîyar bibê û wayîrê yewbînan vejyê û va wa têkoşîn bikerê,  Kurdistan awan bikerê.

	'Çîyê ke Sûr de ameyî cuwîyayîş nînê xovîrrakerdiş'

	Hulya Varane zî arde ziwan ke tecrîdê serê Rayberê PKKî Abdullah Ocalanî nêwirzo do şarê Kurd azad nêbo û va: "Bi azadîya Abdullah Ocalanî şarî eşkenê azad bibê. Ganî ma xo bi felsefeyê ey xo rêxistin bikerê. Ma her wext wina vacê 'Xoverdayîş cuwîyayîş o'."

	Medîne Ormane zî va wexto ke rayî bêrê xebitnayîş, ganî her kes çîyê ke ameyê cuwîyayîş bîyarê verê çimanê xo. Hayrîye Dogane zî arde ziwan ke aye ê rojan qetî xo vîr ra nêkena û ê êdî merdiş, şer û qirkerdişan nêwazenê."