Partîya ke programê aye de ekolojî çin a raye zî çin a 

2018-06-08 11:02:56


	 

	ÎZMÎR - Aktîvîstê ekolojî û hemwelatî dîyar kenê ke dewlete xozaye pêşkêşê sermaye kena û vatî: “Partîya ke tuzukê aye de ekolojî çin a, ray zî çin a."

	 

	Aktîvîsta Ekolojî Sevtap Aydane da zanayîş ke dewlete xoza kerda rant û wina va: "Îzmîr zî binê hêrişê nê polîtîkayan de yo. Cuya xozayî û merdimî binê tehdîdî de yê. Ganî lezgînî hêzê demokrasîyî, ekolojîst û her kes bêrê têhet û vera nê talanî vinderê."

	 

	'Ganî ma vengê xo bidê partîya ke bernameyê aye de ekolojî esto'

	 

	Nuran Ogulbulane zî da zanayîş ke ê seba warê cuyayîşî yê eşkenê tede bicuyê Platformê Pawitişê Derûdorî yê Îzmîrî de ca gênê û wina va: "Daristanê bajar, çimeyê awe bi kîmyewîyan yenê jehrkerdiş. Enerjîya nuklerî do zirarê pîl veja meydan. 24ê Hezîrane de partîya ke xoza pawena do serkewte biba. Ma do raya xo bidê partîya ke bernameyê aye de ekolojî esta.”

	 

	‘Warê ma çin benê'

	 

	Ayşe Çetîna ke vera santralê jeotermal yê qezaya Efelerê Aydinî de yeno awankerdiş de têkoşîn kena û va do raya xo bidê kesê ke xoza pawenê û reaksîyon mojna û va warê înan çin beno.

	 

	Yagmur Bulute zî wendekara lîseye ya û heskerdişê xoza qalî kerde û va ameyoxê ke weş wazenê û do seba nê zî heme çî bikerê.