Tehlîyekerdişê Meles Tekîna 75 serrî do raporê ATKyî dîyar bikero 

2018-06-10 09:16:34


	 

	MÊRDÎN - Meles Tekîna bi sebebê cezaya aye tesdîq bîya amî tepiştiş û dima ra zî surgunê Elezîzî kerdî. Avûkatanê Melese seba veradayîşê bi kontrol muracat kerdî û îdareyê hepisxaneyî zî do gorey raporê Tipê Edlî cewab bidê muracat.

	 

	Meles Tekîn (75) bi sebebê 4 serre û 2 aşme cezaya aye esta, aşma Nîsane de amî tepiştiş û Mêrdîn ra surgunê hepisxaneyê Xarpêtî amî kerdiş. Semedo ke problemê aye weşîye estbî her gam şîne revîr û hetê doktoran ra sewqê Edene amî kerdiş.

	 

	Bi hetkarîya embazanê xo hewcedarîyê xo ana ca. Keyeyê Melese ke şî pêvînayîş dîyar kerdî ke moralê Melese pêwa emr û problemê aye yê weşîye zaf baş bîya. Melese zî keyeyê xo rê mektube eşrawite va baş a, dermananê xo xebitnena û bi piştdayîşê embazan hewcedarîyê xo ana ca. Melese seba nêweşîya qelb, sîne, tansîyon û şekir her gam berdê revîr û doktor aye sewqê Edene kerdo.

	 

	Raporê nêweşxane amebî girewtiş eşrawitî Sazgehê Tipê Edlî û netîceyê raporê Sazgehê Tipê Edlî de ame vatiş ke Melese nêeşkena hepisxane de bimana.

	 

	Avûkatanê aye zî seba veradayîşê aye bi kontrol muracatê hepisxaneyanê Mêrdîn û Xarpêtî kerdî. Îdareyê hepisxaneyî zî va raporê Tipê Edlî pawenê.