Krîterê welatê averşîyaye yê Tayyîp Erdoganî: Dolabe esta, labelê awe çin a!   

2018-06-12 13:13:01


	 

	SEMSÛR - Serekê Pêroyî yê AKPyî Tayyîp Erdoganî çend rojî verê mîtîngê Sakarya de vatbî ‘eke dolabe bikewa heme keyeyan do merheleya averşîyayîşî pê bêra.’ Nê vatişan ra dima reaksîyon vejîyayî. Cografyaya Kurdistanî de xeylê dewî hema zî bê awe yî.

	 

	Serekê Pêroyî yê AKPyî Tayyîp Erdoganî çend rojî verê cu mîtîngê Sakarya de vatbî ‘eke dolabe bikewa heme keyeyan do merheleya averşîyayîşî pê bêra.’ Nê vatişan ra dima reaksîyon vejîyayî. Cografyaya Kurdistanî de xeylê dewî hema bê awe yî. Dewê kurd û elewîyan yenî mexdurkerdiş. Dewa Yalankozî ya qezaya Tutî ya Semsurî 150 keyeyan ra pê yena û 800 nufisê dewe estî. Labelê dewe de ne aw û ne zî cereyan çin î. Dewijî seba awe muracatê şaredarîya Tut û Semsurî kerdî, labelê heme muracatî bênetîce mendî. Cinîyê dewe dîyar kerdî ke lazimîya înan bi cereyan û awe esta.

	 

	Çirra dewe her demserrê hamnanî de zuhabîyayîşî reyde rî bi rî manena. Roje de tena saetêk awe dîyana dewe. Awa şimitişî zî êlula 2017î ra nata bi wesayîtan dîyena dewe. Babete ser o Zeynep  Kîlkemîr, Benazîr Bektaş û Songul Yildize qisey kerdî.

	 

	Her weçînayîşî de sozan danî

	 

	Zeynep  Kîlkemîra ke 16 serrîya dewa Yalankozî de cuyena qiseykerdişê xo de wina va: “Heme weçînayîşan de partîyê siyasî yenî dewe û sozan danî. Labelê dima ra nînê. Tena seba reyan yenî dewa ma. Problemê rayir û sewbîna xeylê çîyî estî, labelê tewr muhîm awe ya.”

	 

	‘Cinîyî heme dejan ancenî’

	 

	Benazîr Bektaşa ke 28 serrrî ya qiseykerdişê xo de qala şaredarî kerde û wina va: “Şaredarîya Semsur û Tutî goş nêdanî peroblemê dewan. Heta çend serran mekteb daxî dewa ma de çin bî. Heme dejan cinîyî ancenî. Ma çirra dewe de kewenî rêze. Seba ma kurd û elewîyî, çîyêk dewa ma rê nêkenî. Ma do rayan bidî HDPyî.”

	 

	Cinîyan ra tewr peyên Songul Yildize qisey kerde û wina va: “Çirra dewe qîmê ma nêkena. Kincê ke yenî şitiş daxî pak nêbenî. Seba ke awe çin a, mah eme çîyan bi destan şuyenî.”