Qers de pesûdewarkarî ameyo sewîyeya çinbîyayîşî  

2018-06-13 09:23:24


	 

	QERS - Yew merkezê tewr girîng yê pesûdewarkarî Qers o û seba krîzê ekonomî û qedexeyê zozanan dewijî mexdûr bî. Dewijê ke mecbur mendî heywananê xo biroşê wina vatî: "Televîzyonan de vanê rewşa welatî zaf baş o. Eke rewşa welatî zaf baş o çira ma mecbur manenê heywananê xo biroşê."

	 

	Dayeyê enflasyonî bi serran o sera 12.15 zêde bibi û Tirkîya de aşma Gulane de enflasyon goreyê aşma bîn sera 1,62 zêde bi.

	 

	Yew bajarê ke pesûdewarkarî ameyo sewîyeya çinbîyayîşî Qers o. Keyeyê ke dewa Susuzî pesûdewarkarî kerdêne, mecbur mendî heywananê xo biroşê.

	 

	'Pesûdewarkarî destê ma de mendib o zî ame wedartiş'

	 

	Songul Uzeyîra ke bi serran o bi pesûdewarkarî debara xo kena va mecbur mendê heywananê xo biroşê û wina va: "Semedo ke ma nêeşkenê şêrê zozanan, ma vaşê parî danê heywanan. No zî qîmê înan nêkeno. Şit baş nêdanê. Warê ekonomîya cinîyan çin o. Ma pesûdewarkarî kerdêne o zî êdî nêmend. Hîrê dewarê mi bî la nika yew mend. Ê bînî mi rotî."

	 

	Songule dewamê qiseykerdişê xo de arde ziwan ke mêrdeyê aye nêeşkeno bixebityo û dewlete zî her ke şina merdiman feqîr kena û wina va: "Dewan de cuyayîş zehmet bi. Ma nêeşkenê heywanan wey bikerê. Ma yenê mexdurkerdiş. Ma verê heywananê xo berdêne zozanan." 

	 

	Elmas Uzaye zî da zanayîş ke krîzê ekonomî roj bi roje tewr zêde beno û wina va: "Eke ekonomîya welat hende baş a çira ma heywananê xo roşenê? Çimeyê debara ma yew bi yew destê ma rê yenê girewtiş. Ganî qedexeyî bêrê wedartiş."