'Tedayê hepisxaneyan bi talîmatê wezaretê edaletî ra yeno kerdene' 

2018-10-14 13:23:23


	 

	Sîbel Ozalp

	 

	ÎZMÎR - Sereka Komeleya Piştdayîşê bi Hepisxaneyan dir yê Îzmîrî Selma Altane dîyar kerde ke seba binê şert û mercê merdiman de bicuyê dewlete berpirîsyar a û wina va: "La ma ewro ewnîyenê ke teda û îhlalkerdişê heqan bi talîmatê wezaretê edaletî yenê kerdiş."

	 

	Înîsîyatîfê Piştdayîşê bi Hepisxaneyan dir 8ê Adare de bi hawayêke fermî ame akerdiş. Sereka komeleya Selma Altane bale ante ser îhlalkerdişê sereyîn de hepisxaneyê Tîpê F yê Kiriklar yê Îzmîrî û hepisxaneyê Tîpê T yê Odemîşî û heme hepisxaneyan û wina va: "Bi OHALî dir teda heme hepisxaneyan de ameyo meydan. Pêwa OHAL wişt zî îhlalkerdiş û teda dewam kerdî."

	 

	'Teda bi qerarê wezaretê edaletî yenê kerdene' 

	 

	Selmaye da zanayîş ke şert û mercê cuya hepisxaneyan binê berpirsîyarîyê dewlete de yê û wina va: "La ma ewro ewnîyenê ke bi taybet bi talîmatê wezaretê edaletî binpêkerdişê heqan yenê cuyayîş. Yew nimûneyê nê îhlalkerdişê serê hepisxaneyan bi nameyê M.Saît Yildirimo ke hepisxaneyê Tîpê F yê Kiriklarî de maneno. Pêwa ke cezaya ey muebetê girano zî bi talîmatê wezaretî vistî hucreyê û 24 saetan binê tecrîd de mendê."

	 

	'Heqaretan kenê û provokasyon kenê'

	 

	Selmaye dewamê qiseykerdişê xo de da zanayîş ke hepisxaneyê Tîpê F yê Kiriklarî radyoyê hepsîyan qantîn ra girewtê, kom kerdê û wina va: "Hema hema her roj gardîyan û cendermeyî hepsîyê sîyasîyan rê heqaretan kenê û dima ra bi vatiş provakasyon kenê. Pêvînayîş vistê 30-40 deqeyî. Hûmara kitabê bi 5 heban ameyê sînorkerdiş. Hepisxaneyê Tîpê T yê Odemîşî zî eynî caardiş kenê. Aşmêke reyke vetî spor. Seba ke derman nêkenê, mêsikî kewtê koxuşan. Reyna gardîyanî bi hawayêke kêfî cezaya dîsîplînî danê."

	 

	Selmaye bale ante ser rewşa hepsîyê nêweş û va hepsî nînê sewqkerdiş ya zî erey yenê sewqkerdiş û wextê sewqkerdişan de zî şertê nêbaş de benê. Selmaye veng da wezaretê edaletê û îdareyê hepisxaneyî kerd û va ganî vera heqê hepsîyan rê rêzdarî bêrê mojnarayîş.