'Ganî kiştoxê Remzîye bêrê muhakemekerdiş' 

2018-11-23 12:59:52


	 

	WAN - Remzîye Bora 7 aşmî diganî bî û deeştişê serê keyeyê aye de amî qetilkerdiş, di serrî serê merdişê aye ra derbaz bi û dosya aye bi sebebê ‘seba endamîyê rêxistine hewce bi cigêrayîşî çin o' ame padayîş. Kiymet Abî va ganî kiştoxê Remzîye 25 Teşrîna Peyêne de bêr muhakemekerdiş.

	 

	19ê Nîsana 2016an de taxa Hacibekirê Îpekyolê Wanî de deeştişê serê keyeyê Remzîye Bora 27 serrî ke 7 aşmî diganî bî, bi guleyê polîsan bi giranî birîndar bî û neqlê Nêweşxaneyê Cigêrayîşî yê Perwerdeyê Mintiqaya Wanî amî kerdene û uca de bebeka aye bi sezeryan ci ra amî girewtiş û Remzîye zî 28 rojî ra dima cuya xo vindî kerde.

	 

	19ê Nîsane de mêrdeyê aye Îrfan Boro ke wextê hedîse keye de nêbi zî ame tepiştiş û tewqîfkerdiş. Dozgerîye bi îdiayê ‘endamîyê rêxistine’ waşt ke  Îrfan bêro cezakerdiş.

	 

	Kêna Remzîye, Nevale nika eme xo sey maya xo zana û pîyê xo hepisxane de vînena. Pîrêke Nevale, Kiymet Abî zî bi fotografê Remzîye boya xo hîra kena.

	 

	'Torna mi bê maye û bê pî pîl bî'

	 

	Kiymete arde ziwan ke Remzîye cinîyêke xeylê bi hêz bî û wina va: “Serrêke bi zewicnayîbî. Aye waşte ke serê herra xo bêra definkerdiş. Ma waştişê aye ard ca. Fotografê aye hema dês de daliqnayeyê. Ez nêeşkena rîyê Nevale biewnê. No semed ra roja hedîse yena vîra mi. Torna mi hem bê maye û hem zî bê pî pîl bena. Nevale ema xo sey maya xo zana. Ema aye, aye rê mayîtî kerde."

	 

	Kiymete tewr peyîn qiseykerdişê xo de waşt ke kiştoxê Remzîye bêrê cezakerdiş û va do qetî hêrsê aye nêqedîyo û dejê aye zî do peynî nêbo.