Gulîstan Azak

 

STENBOL - Welatîyê ke Stenbolî de ciwîyenê, vera krîzî têkoşînê ciwîyayîşî danê û dîyar kerdî ke fatureyê krîzî înan rê ameyo barkerdene û vatî: "Hukmat bi koçike dano, bi kondês gêno. Ma bi zem wirzenê û rakewenê. Nê întîxar, krîz ra yenê meydan. Hukmat vera ke cêbe xo pirr bikero, wa rewşa ciwan û şarî ra biewno."

 

Welatîyê ke barê giran ê krîzî nêeşkenê wedarnê, êdî nêeşkenê keyeyê xo ra zî vejîyê. Întîxarê wendekara unîversîta Sîbel Unlîya ke hema rojeve de yo û menga çele de bursê wendekaran erey ame dayene.

 

Sade Çakire arde ziwan ke hukmat bi problemê şarî dir eleqedar nêbeno û vat: "Hukmat vera ke cebê xo pirr bikero, wa rewşa welat biewno. Her çî eşkere werte de yo. nêre. Hewce bi vatişê zêdeyan çin o. Însanî êdî her çî zanê û vînenê."

 

'Sebebê întîxaran krîz o' 

 

Elîs Çakire zî da zanayene ke dewlete vera berjewendîyê şarî, berjewendîyê xo dano vernî û wina vat: "Netîceyê krîzî, şarî rê yeno birnayene. Krîz werte de yo û vanê, 'ekonomîye pîl bena.' Eke krîzê ekonomî çinbo, nê întîxar û merdişî çira virazênê gelo?"

 

'Krîz tesîrêko pîl însanan ser o keno'

 

Onay Yeşariye ke vilan roşena zî dîyar kerde ke her çiqas vayeyê vilan arda war zî kes nêeşkeno bigîro û vat: "Girewtişê vilan zî êdî luks o. Ciwanî betal ê û wareyan de veng geyrenê. Ganî hukmat nê ciwanan rê wareyê karî awan bikero. Ma zî seba ke veyşan nêmanê xebityenê. Her çî werte de yo."

 

Gulşen Ozkiyiciye zî bale ante serê krîzî û vat: "Hukmat bi koçike dano, bi kondês gêno. Ma rakewenê zem, ma wirzenê zem o. Ma êdî nêeşkenê çîyêk bigîrê."