Şehrîban Aslan

 

AMED - Qezaya Bismilî ya Amedî 3yê teşrîna peyêne 2019an de camêrdo bi nameyê Hasîp A. cinîya xo Muteber A. qetil kerdib. Serdozgerîya Komare ya Amedî îdianame amade kerd û hetê 13in Dadgeha Cezaya Giran ya Amedî ra ame qebulkerdene. Yewin roniştişê ci do 8ê nîsane de bêro vînayene.

 

Taxa Altiokî ya qezaya Bismilî ya Amedî de cinîya bi nameyê Muterber A.ye 3yê teşrîna peyêne 2019ine de hetê Hasîp A. ra ameye qetilkerdene. Hatîp A. dimayê hedîse ame tepiştene û serdozgerîya Komare ya Amedî zî derheqê Hasîp A. de sûcê 'qestî çew kiştene', 'bi ezîyet û çimsûrî kiştene' ra îdianame amade kerd.

 

Îdianameyî de ame dîyar kerdene ke rojêka verê hedîseye, munaqaşa vejîyayo û roja hedîse zî pêrodayîş dewam kerdo û gumanbar bi hacetê birnayene Muteber A. qetil kerdo. Heto bîn ra ame dîyar kerdene ke gumanbar îfadeyê xo de îdia kerdo ke bi 10 serrî yo ke Mutebere dir her wext munaqeşe kerdo û gumanbar îfadeyê xo de îdia kerdo ke Mutebere ey kesêko bîn dir xapênayo.

 

Goreyê raporê otopsîyî zî bedenê Mutebere de cayê cîya de pêroyî de 24 darbeyê kardî estê. Yewin roniştişê dewa 8ê nîsane de do bêro vînayene.