Sara Şêx Hesen 

 

ŞEHBA - Cinîyê Efrînî yê ke Kampa Berxwedanî de ciwîyenê, serê tehlukeyê Vîrusê Korona yê serê Kantonê Şehbayî de qisey kerdî û vatî: "Eke no vîrûs mîyanê ma de vila bibo, reseno pêroyî kampe. Vîrusê Korona seba merdimê kampe tehlukeyêko pîl o.”

 

Hûmara merdimê ke bi Vîrusê Korona kewtê her ke şino zêdeyîr beno û vilayê temamê dinya beno. Vîrûsê Korona peynîya menga kanûne de şaristanê Wuhanî yê Çînî de vejîya. No vîrûs bi sebeb ke bi hezaran merdimî cuya xo vindî kerdî û xeylêk kesî karantîna de yê. Goreyê zanayîşê Rêxistinê Weşîye ya Dinya, vilabîyayîşê vîrusî roj bi roj zêde beno. Derheqê babete de cinîyê Efînijî şîrove kerdî. 

 

‘Korona tehlukeyêko pîl serê kampe virazeno’

 

Fîdan Mihemed Memoye serê tehlukeyê Vîrusê Koronayî de wina vat: "Vîrûsê Koronayî wextêko yo temamê dinya de vila bi û xeylêk kesî cuya xo vindî kerdî. Heta nika Vîrusê Korona nêresaya herême ma, la semedo ke ma xo vîrus ra bipawê û nêverdê vila bibo, ganî ma komelê xo vera tehlukeyê îqaz bikerê. Seba ke ma herêmeka girewte de ciwîyenê û îmkanê ma zî kêm ê. Heta nêweşxaneyê ma de derman zî peyda nêbenê. Eke no vîrus mîyanê ma de vila bibo, tesîrêko negatîf do kampe ser o bikero û krîzêko vejîyo meydan.”

 

‘Pakîtî semedê pawitişê vîrusî giring a’

 

Kifiyat Elîye wina vat: “Ganî ma semedê Vîrusê Koronayî tedbîrê lazim bigîrê ke nêreso herême ma. Îmkanê ma kampe de xeylêk tay ê. No zî tesîr keno. Goreyê îmkanê bîyaye, ma kampa xo pawenê û her roje pakîtî kenê. Eynî wextî de ma rojane destê xo şonê û werdê ke ma viraznenê baş şonê û wina viraznenê. Nîşaneyê nêweşîye dejê qirike, helmo xidar û germbîyayîşê ganî zêde beno û derûdorê xo esas bigîrê.”

 

‘Goreyê îmkanê xo tedbîrê lazim bigîrê’

  

Êvîlîn Hemoye zî serê Vîrusê Koronayî de wina vat: “Vîrûsê Koronayî tesîrêko pîl temamê dinya û merdimayî kerd. Cuya hezaran kesî tehluke de ya. Heta derman peyda bibo, ganî pêro dinya hemverê vîrusî şîyar biba. Ma zî sey şarê Efrînî û Şehbayî goreyê îmkanê xo tedbîrê lazim gênê, la lazim o ke hetkarî û lazimîyê ke estê bêrê dayene.”