ŞIRNEX - Şirnex de keyeyê TOKÎyî semedê varanî binê awe de mendî.  

 

Merkezê Şirnexî 14ê Adara 2016ine de qedexeyê tebervejîyayîşê kuçeyan amebi kerdene û 8 mengî dewam kerdib. Xeylêk taxê Şirnexî ameybî rijnayene. Îdareyê Konutê Komî (TOKÎ) nê taxan de awanîyan viraştibî. Mengê derbazbîyaye de nê keyeyî teslîmê wayîrê înan ame kerdene. Keyeyê TOKÎyî bi mîlyonan pere ci rê ame xerckerdene, semedê varnayîşê varanî binê awe de mend.

 

Varano ke vizêr vara tesîrê xo ramojna û keyeyê taxa Gazîpaşayî binê awe de mendî. Awe dêsê keyeyî de eşt. Welatîyan dîmenê keyeyê înan ke binê awe de mendê vila kerdî. Dîmenan de yeno asayene ke her cayê keyeyê înan binê awe de mendê.