AMED- Koordîsyona Krîzê yê Kongreya Komeleya Demokratîkî derheqê şubeyê Tirkîya de vîla beno eşkerayîye da û vat: "Ziwan, bawerî, fikrê îdeolojîk û polîtîk çi beno wa bibo, semedê asayîş bêro girewtene û ma do bieşkê seba şarê xo çi bikerê qisey bikerê. Nê serdemî de ma do bi heme sazgehan dir bê û ma dîyar kenê ke ma xebatê hempar rê zî akerde yê."

 

Kongreya Komeleya Demokratîk (KCD) hemberê vîrûsê koronayî 'Koordînasyonê Krîzî' awan kerdî û eşkerayîye dayî çapemenî. Eşkerayîye awanîya KCDyî de ameye kerdene. Hemsereka KCDyî û parlamentera Partîya Demokratîkî ya Şaran (HDP) ya Colemêrgî Leyla Guvene, hemsereka Partîya Herême Demokratîkî (DBP) Salîha Aydenîz û Keskîn Bayindir, parlementerê HDPyî Nejdet Îpekyûz, Ebrû Gunay, hemserekê MED - TUHADFEDî Mehmet Temîzyuz beşdarê eşkerayî bî. Salone de pankartê "Mabêne bike mabêne xo, xo bipawê" ame deliqnaye. Eşkerayî bi kurdî û tirkî ame dayene. Parlamenter Necdet Îpekyuzî eşkerayî bi kurdî da û Hemsereka KCDyî Leyla Guvene zî bi tirkî eşkerayî da.

 

'Keye ra mevejîyê'

 

Eşkerayî de wina ame vatene: "Destê xo bi sabunî bişuwê. Masaya ma krîzî do şarê ma rê zanayîşanê rastikênan bida. Ma venga şarê xo danê ke paştî bidê pêro hewcedaran. Ganî şarê ma vera karantînayan bi hawayêkê makulî tebdîrê werdî bigêro. Seba şarê ma yê xizanî zî Masaya Krîzî do tay xebatan bikera. Sinifa tewr birîske kokimî ya. Ma venga şarê xo danê ke paştî bidê kokiman, înan reyde têkilîye ronê. Mîkrobî tewr zaf şaristanan de yê. Eke îmkanê şarê ma esto ganî xo biresno dewan.

 

Gerek zanayîşê rastî bêrê dayene

 

Ganî hukmatî seba her kesî tebdîran bigêro û bi hawayêkê zelalî zanayîşan bido. Zîndanan de bi seyan tepişteyê nêweşî, kokimî, domanî estê ganî nê bêrê veradayene. Ganî xizmetê sey awe, ceyran, weşîye û hacetê pakî bêpere bêrê vilakerdene. Deynê esnafan, merdimanê ê bankayan rê ganî bêrê taloqkerdene.

 

Wa sazgehê sivîl rolê xo kay bikerê

 

Masaya krîzî ra berî qeza û şaristananê ma de, partîyê sîyasîyî, rêxistinê dezgehê sivîlî û şaredarîyê ma bi hawayêkê lezî masayanê krîzî do awan bikerê. Dewe û taxan de torra paştdayîşî do bêrê awankerdene. Ma do medyaya komelkî ser o zî tay xebatan do bikerê. Ma do dem bi dem derheqê xebatanê xo de zanayîş bidê. Şarê ma eşkeno na nûmare ra bi rayîrê telefonî û whatsapî bireso Masaya Krîzî: 0552 48618 20."