AMED - TUAY-DERê Amedî veng da Wezaretê Dadî û selahîyetdarê hukmatî kerd ke bi hepsîyê nêweşan dir pêro hepsî ganî serbest bêrê veradayene.

 

Komeleya Hetkarîya Bi Keyeyanê Tepişteyan (TUAY-DER) bi eşkerayîyêke vera Wezîrê Weşîye yê Tirkî nêrazîbîyayîşê xo mojna ke derheqê rewşa zîndanan de zanayîşî pare nêkerdî.

 

Komeleya Hetkarîya Bi Keyeyanê Tepişteyan (TUAY-DER) ya Amedî, derheqê rewşa zindanan da eşkerayîya nuşteyî da.

 

Eşkerayîye TUAY-DERÎ wina ya:

 

''Zîndanan de 1300 tepişteyê nêweşî estê ke rewşa weşîye ya 450ê înan nêweşîya giran a.  Nê tepişteyan ra nêweşe Semîre Dîrekçî zîndanê Amedî de amelîyat bîye û bi nê hawayî 9 mengan o ke yena tepiştene. Tepişte Mehmet Ozkan 80 serre yo, nêweşê qelbî, KOAHî, tansîyonê berzî û guatîrî yo. Tepişte Halîl Guneş zîndanê Amedî de nêweşê kanserî, epîlepsîyî û cigerî yo.''

 

Ma qerqilîyenê. Ma teber de mîyanê şert û mercanê zoran de vera Korona xo ver danê. Gelo zîndanan de pakîya mitbaxî, robarî, tuwaletî û cayê rakewtişî senî yena kerdene? Îranî tepişteyî vera dayî, DYA zî munaqeşe kena ke tepişteyan vera bida. Tirkîya de derheqê na babete de munaqeşe nêno kerdene ke na rewşa ma qerqilnena. Ma sey TUAY-DERî venga Wezaretê Edaletî û selahîyetdaranê hukmatî kenê ke sere de tepişteyê nêweşî pêro tepişteyî ganî cade bêrê veradayene yan zî cezaya înan bêra taloqkerdene.''