AMED - MED TUHAD-FEDî seba ke hepsîyê sîyasîyî teberê vurnayîşê înfazê ceza de ameyî verdene, nêrazîbîyayîşê xo ramojna û venga rayaumûmîya demokratîke da ke hîsger bibo û seba înfazê ceza yê têdûştî û edîlî vengê xo berz bikero.

 

Federasyonê Komeleyanê Huqûqîyan û Paştdayîşî yê Keyeyayanê Hepsîyan û Hukmwerdeyan ê Medî (MED TUHAD-FED) seba ke hepsîyê sîyasîyî teberê înfazê ceza yê seba Covid-19î de ameyî verdene eşkerayîye daye û vat zîndanan de rîskêko pîl esto. MED TUHAD-FEDî da zanayene ke Wezaretê Edaletî derheqê kêmkerdişê înfazê ceza de paketa hukmî de cîyatîye kerde. MED TUHAD-FEDî bale ante zîndanan ser û îfade kerd ke seba ke vera vîrusê Korona tedbîr nêame girewtene zîndanan de tehlukeyêko pîl esto û wina vatî: “Zîndanê Amedî de mîyanê werde hepsîyan de lapik vejîya, werd goreyê şertanê hîjyenî nîyo. Zîndanê Seydîşehîrî de vera vîrusê Korona tedbîr nêame girewtene, hepsîyanê malzemeyê pakîye nêameyî dayene. Zîndanê Şakaranî de sabun zî nêno dayene. Hepsîyo bi nameyê Mustafa Geylanî yo ke Zîndanê Xarpêtî de maneno hucreyê yewkesî de yeno tepiştene û malzemeyê pakîye nêdîyayî ey. Zîndanê Bayburtî de rîxmê şîkayetanê kixe, vêşayîşê qirikî zî tepişteyan rê test nêro kerdene, zîndan nêno dezenfektekerdene. Zîndanê Êlihî de hepsîyan vera bêtêdûştîya înfazî şewat vet.”

 

MED TUHAD-FEDî sere de Wezaretê Edaletî yê Tirkî venga dezgehanê dewlete da ke tebdîran bigêrê û meseleyê zîndanan bêrê çarekerdene û waşt ke sere de keyeyê hepsîyan, rayaumûmîya demokratîke hîsger bibê û seba ke qanûnê înfazî bi hawayêkê têdûştî û edîlî bêro caardene vengê xo berz bikerê.