WAN - Komelnas Aslihan Şedala ke Komeleya Cinîyan ê STARî ya Wanî de ya, vera her tewir şîdetê serê cinîyan de xebate kena. Aslihane bale ante şîdetê serê cinîyan û vat: "Cinî tewr tay qasê vîrusî, bi şîdetê camêrdan yê bi tehlukeyî dir rî bi rî yê. Cinîyê ke rastê şîdetî ameyê, yan zî îhtîmalê ke do şîdetî dir bêrê rî bi rî wa xo biresnê ma."

 

Tirkîya de hûmara kesê ke vîrusî ra cuya xo vindî kerdî, resa 500î. Na hûmare roj bi roje zêdyena û çarçewaya tedbîran de zî vengdayîşê, keyeyê xo de bimanê yenê kerdene. La cinîyê ke keye de manenê, rastê her tewir şîdetî yenê û derheqê nê de zî tu tedbîrî çin ê. Verfeka Meclîsê Cinîyan ê HDPyî Ayşe Acar Başarane, da zanayene ke ganî pêro şaristanan de koordînasyonêke krîzî bibo. Komeleya Cinîyan ê STARî ya Wanî zî piştdayîş dayî nê pêşnîyazî Ayşeye.

 

'Camêrdî problemê ekonomîye kenê sebeb'

 

Komelnas Aslihan Şedale, dîyar kerde dimayê ke vîrus vila bîyo, xeylêk kargerî ameyî padayene û wina vat: "Cinî pêro karê keyeyî ra bepirsîyar a û na rey zî seba camêrdo ke keye de yo zî bê sînor xizmet kena. Camêrd, problemê ekonomîye keno problem û keno sebebê şîdetî."

 

'Îqtîdar vernîye kiştişê cinîyan akeno'

 

Aslihane arde ziwan ke prosesê îzolasyonî de kiştişê cinîyan zêde bîyo û qiseykerdişê xo wina dewam kerde: "Na rewşe de cinî qasê vîrusê korona, bi tehlukeyê şîdetî dir yenê rî bi rî. Îqtîdar vera metodê têkoşînî yê vera şîdetî bivîno, verpayê ci polîtîkayê ke kiştişê cinîyan akeno, keno dewre."

 

'Cinî eşkenê xo biresnê ma'

 

Aslihane arde ziwan ke ê seke Komeleya Cinîyan ê STARî kîşte cinîyan de yê û qiseykerdişê xo wina qedêna: "Ma bi heme mekanîzmayan, hûmara vernîgirewtişê şîdetê serê cinîyan de amade yê. Cinî tena nîyê. Cinîyê ke rastê şîdetî ameyê û îhtîmalê ke bi şîdetî dir do bi rê rî bi rî, eşkenê xo biresnê ma."

 

Bi na hûmara eşkenê xo biresnê Komeleya Cinîyan ê STARî: 0432 216 66 61