Rojda Aydin 

 

ŞIRNEX - Semedê hepsîyo bi nameyê Yusuf Şahînî 120 serrî ceza ci rê ameya birnayene, bi rayîrê telefonî bale ante  serê rewşa zîndanî û vat: "Tîya tedbîrê cîdî nêameyê girewtene. Tu bendewarîyê ma îqtîdarî ra çin o, labelê ganî şarê ma, sîyasetmedar û sazgeh û dezgehê sivîl verê ke erey bibo, wa vengê xo berz bikerê."

 

Vîrûsê koronayî temamê dinya bi tesîr bi û bîlançoyêko giran xo dir ard. Tirkîya de zî her roje ke şono hûmara merdoxan û hûmara nêweşan ke pê kewenê zêde bena. Nika cayê tewr bi rîsk zî zîndan ê û tîya tehluke her ke şono pîl beno. Eynî wextî de reaksîyonê vera Qanûnê Înfazî ke hetê AKP û MHPyî ra ameyo amadekerdene zî zêde benê. Hepsîyê sîyasî qanûn ra feyde nêgînê. Hepsîyo bi nameyê Yusuf Şahîn 5 serrî yo Zîndanê Tîpê T yê Şirnexî de yo û 120 serrî ceza ci rê ameya birnayene, bi rayîrê telefonî derheqê rewşa zîndanî da zanayîş da.

 

'Tena dekewtiş û vejîyayîş zîndan de ameyo qedexekerdene'

 

Yusufî, bi rayîrê telefonî nê çî ard ziwan: "Koxuşê ke ez ci de mendêne de nêweşê kronîkî zî estê. Labelê doktorî çin ê. Tîya embazê ke rewşa înan xirabê zî estê. La bi tena tansîyon û adirê înan yeno pawitene. Xêrcê nê çîyan tu çî nîno kerdene. Sey tedbîr tena vejîyayîş û dekewtişê zîndanî ameyo qedexekerdene. Labelê zere de tu tedbîr nêmaeyo girewtene. Ma tîya bi provokasyonan dir zî rî bi rî manenê."

 

'Tîya malzemeyê hîjyenîk nêdanê ma'

 

Yusufî, qiseykerdişê xo de bale ante serê malzemeyê pakitî û vat: "Tîya malzemeyê pakitî nêdanê ma. Ma bi îmkananê xo kantîn de malzemeyê pakitî gênê. La malzemeyê hîjyenîk yê seke maske û dezenfekte nînê dayene. Bi dinya dir tu têkilîyê ma çin o û pêro zî ameyî qutkerdene. Kanalê xeberan yê televîzyonan zî ameyî astengkerdene. Tena çend kanalê medyaya tirkan estê. Ma nika nêzanê ke dinya de çi qewêmêno. Ma tu zanayîş nêgînê. Nika zîndan de rewşêka bi no hewa esta. Koxuşa ke ma nika tede yê semedê 10 hepsîyana, labelê ma 14 kesî ci de manenê. Qawişe 35 metreqare çin a, la ma 14 embazî tîya manenê."

 

'Tu bendewarîyê ma îqtîdarî ra çin o'

 

Yusufî tewr peyîn qiseykerdişê xo de wina vat: "Prosesêko bi nê rengî de teber de semedê zîndanan vengêko zêde nêvejîyeno. Ma bi îmkananê xo û medya hewl danê ke vengê xo biresnê. Ma wazenê pêro sazgeh û dezgehî vera nê vengê xo hîna tewr berz bikerê. Ma wazenê parlamenterî tim û tim meclîsî de rewşa zîndanî bîyarê rojeve. Ma wazenê hem tedbîr bêrê girewtene û hem zî çîyê lazim bi ca bîyarê. Xora tu bendewarîyê ma îqtîdarî ra çin o. Xora ma nêzdîbîyayîşê înan ê vera şarî vînenê. Waştişê ma bi tena no yo; prosesêko winasî de nêzdîbîyayîşêko merdimayî û ehlaqî bi ca bêro. Bi hezaran hepsî estê. Tena hemverê ma ney gerek vera her kesî merdimayî û têduştî bibo. Tîya seba nêweşîyan beno ke cenaze zî vejîyê. Nika koxuşa ma de 4 û 5 embazê ma nêweşîyê înan yê kronîkî estê. Nika vera ma teda çin o, labelê no zî nîno manaya ke do çinbo. Wa şar wayîrê hepsîyê sîyasîyan vejîyo."