MÊRDÎN - Hemşaradara Qoserî Nîlufer Elîk Yilmaze ke dimayê qeyûm tayînê ci ame kerdene û eşrawitî zîndanê Tarsusî. Waya ci Yuksel Elîke wina va: “Tecawizkar, kiştoxê cinîyan, çete heme vetî teber. Vîrus her ke şono vila beno. La zîndanan de îmkanê xopawitişî çin o. Ma bi endîşeyîn ê.”

 

Virusê korona (Covîd-19) roj bi roje bi lez vila beno û însanan dir zî endîşe û ters pîl beno. Nê rojê ke însanan xo kerdê binê karantînayî de, zîndanan de îmkanê xopawitişî çin ê û no zî beno sebebê endîşeyan. Bi qanûnê înfazî yê newe ke bi rayanê AKP û MHPyî Heyetê Pêroyî yê Meclîs ra derbaz bi, 90 hezar hepsîyê edlî serbest ameyî veradayene. La bi hezaran hepsîyê sîyasî nika şertê giranan de yenê tepiştene. Nê ser o keyeyê hepsîyan û xeylêk sazgehan reaksîyon ramojnayî û vatî, ganî hepsîyê sîyasî serbest bêrê tahlîyekerdene.

 

Nîlufer Elîf Yilmaze 7 mengî yo tepişte ya

 

Zîndanan de parlamenterê verê, hemşaredar, endamê meclîsî û  xeylêk sîyasetmedarî estê. Yew hemşaredaranê hepsîyan ra hemşaradara Qoserî Nîlufer Elîk Yilmaze ya û zîndanê Tarsûsî de ya. 4ê teşrîna peyêne 2019 de qeyûm tayînê şaredarîyan bi û dima ra Nîlufere ameye tepiştene. Nîlufere 7 mengî yo hepsî ya. Waya ci Yuksel Elîke derheqê şert û mercanê zîndanî de endîşeyê xo ard ziwan.

 

‘Dimayê ke qeyûm ame tayînkerdene waya mi tepiştî’

 

Yuksele da zanayene ke şaredarî bi îradeyê şarî amî girewtene û wina va: “Dimayê ke qeyûm ame tayînkerdene, waya mi wezîfe ra amî girewtene. Dima ra zî amî tepiştene. 12 rojan destbendkerde mende. Nê prosesî de nêverdayî ke avûkatê ci şorê verê aye. Dima ra zî waya mi eşrawitî zîndanê Tarsûsî.

 

‘Sîyasîyan terorîst îlan kenê’

 

Yuksele da zanayene ke şert û mercê zîndanî xirab ê û wina va: “Gama ke nameyê înan sîyasî be sucdar yenê îlankerdene. Eke sucdar bî çira namzedîya înan qebul kerdî, çira mazbatayan dayî? Nê dir şaredarî hedef ameyî girewtene. Nîlufere 7 mengî yo bê delîlên tepişte ya. Pêvînayîş û dadgeha waya mi çin ê. Coka ma aye nêvînenê. Ma nêzanê şert û mercê zîndanî senîn ê. Tehlukeyê vîrusê koronayî zîndanan de zî vila bîyo. Verê ke Nîlufere bêro tepiştene, nêweşe bî. Zîndan de nêweşîya ci dewam kena.”

 

‘Ma terorîst nîyê, ma Kurd ê’

 

Yuksele reaksîyon vera 3in Paketa Hukmî da û va: “Paketêka newe yê hukmî vetî. Tecawizkar, mafya û kiştoxê cinîyan pêrûne vetî. Bi hezaran sîyasetmedaran zî tede verdayî. Ma nêzanê rewşa waya mi senîn a. Ma bi endîşeyîn ê. Lajêko ci esto. Dayîka xo meraq keno. Seba dayîka bermeno. Waya mi zî lajê xo meraq kena. Ma edalet wazenê. Ma heqê xo wazenê. Waya vera bidê. Ma sucdar nîyê. Ma kurd ê. Vîrus her ke şono vila beno. Zîndanan de îmkanî xo pawitişî çin ê. Ganî bêrê veradayene. Heqê înan çin o, înan ûca de bigîrê. Gelo înan senîn pawenê.”