Rojda Seyidxan

 

QAMIŞLO - Endama Şaredarîya şaristanê Dêrîkî Şîlan Elîye derheqê dezefenktekerdişê şaristanê Dêrîkî de qisey kerde û va: "Heta ke destê ma ra bêro û dermanê ke destê ma de estê, ma do şarê xo nêweşîye ra bipawê. Vengdayîşê ma şarê ma ra esto ke ma dir bibê hetkar û keyeyê xo de bimanê."

 

Dimayê vilabîyayîşê Vîrûsê Koronayî (COVÎD -19) heme dinya de xeylêk kesan cuya xo vindî kerdî û bi hezaran kesî zî binê kontrolê doktoran de yê, Vakûr û Rojhelatê Sûrîye de xeylêk tedbîr ameyî girewtene. Şaristanê Dêrîkî yê girêdayê Kantonê Qamişloyî de zî xeylêk tedbîrî ameyî girewtene û Şaredarîya şaristanê Dêrîkî nêzdîyê 50 sazgeh, cayê pêroyî û kampanê Newroze û Roje ameyî dezefenktekerdene. Derheqê babete de Endama Şaredarîya şaristanê Dêrîkî Şîlan Elîye ercnayîş kerde.

 

'Ma heme şaristanan de hemleyê dezefenkte dayo destpêkerdene'

 

Şîlane sereyê qiseykerdişê xo de bale ante serê tedbîrê ke ameyê girewtene û wina va: "Tersê Vîrusa Koronayî pêro dinya de vila bîyo. Ma zî Vakûr û Rojhelatê Sûrîye de xeylêk tedbîr girewtê. Ma çarçewaya asayîşê komelî de tena nêweşxane, dermanxane, firin, hêzê asayîşî û lazimayîyê ciwîyayîşî verdayê ke bi xebityê. Hemleyê dezefenkteyî zî heme şaristan, kuçe, sûke û sazgehan de ameyo kerdene."

 

'Ma pêro cayan dezefenkte kerd'

 

Şîlane dewam de qalê kar û barê şaredarîya Dêrîkî kerde û va: "Ma sey şaredarîya şarî, semedê pawitişê şarî her ca dezefenkte kerd. Dermanê dezefenkteyî hetê heyetê weşşîye ra ame vilakerdene. Ma hemleyê xo yê diyîn de zî ma cayê pêroyî seke kuçe û sûke dezefenkte kerd. Tewr peyîn zî ma kampanê Newroze û Roje zî dezefenkte kerd."

 

'Ma vera Vîrusê koronayî pîya xo ver bidê'

 

Şîlane dîyar kerde ke do qetî vera vîrusî xebate bikerê û wina va: "Heta ke ma ra bêro û dermanê ke destê ma de estê, ma do şarê xo na nêweşîye ra bipawê. Vengdayîşê ma şarê ma ra esto ke ma dir bibê hetkar û keyeyê xo de bimanê. Ma do vera vîrusê koronayî pîya xo ver bidê."