AMED - Hepsîya nêweşe Rojbîn Perîşane Zîndanê Gebze de tepişte ya. Dayîka aye Sevîm Perîşane qala rewşa kênaya xo kerde û wina va: “Kamî cayê dinya de kesêk 28 serrî tepişte mendo? Senî ke no qanûnî ra tepişteyê bînî serbest ameyî veradayene, wa domanê ma zî serbest bêrî verasayene. Ma seyyewbînanîye wazenî.”

 

Badê qanûnê înfazî kar û xebatê tehlîyekerdişê 90 hezar hepsîyan dest pêkerde. Vîrusê Korona vera şikê weşîya hepsîyan zî her ke şono zêde beno. Keyeyê hepsîyan reaksîyon nîşanê qanûne dayî û dîyar kerdî ke ganî qanûn seyyewbînan pê bêro. Hepsîya nêweşe Rojbîn Perîşane Zîndanê Tîpa M yê Gebze yê Kocaelî de tepişte ya. Dayîka Rojbîne, Sevîm Perîşane derheqê babete de qisey kerde.

 

5 zîndanan çarnayî

 

Rojbîn Perîşana nuştoxe 1992î ra nata tepişte ya û xeylê kitabê aye sey roman û hîkayeyan estî. kitabê Rojbîne hetê şarî ra raştê eleqeyêko gird yenî û zêde yenî wendene. Rojbîne wexto ke zîndan de bî bi xeylê nêweşîyan kewte û amelîyat bîya. Dayîka Rojbîne, Sevîm Perîşane qala kênaya xo kerde û waşte ke hepsîyê sîyasî zî qanûn ra feyde bigêrî û va: “Şertê zîndanî do çiqas baş bibî? Rojbîne 1991î de wendekara Unîversîteya Sêrtî ya Fakulteya Perwerdeyî bî. Aye wext tewrê PKKyî bîye. Serrêk ra dima zî ameye tepiştene. Yew menge û 5 rojan nezaret de mende. Dima ra berdî Zîndanê Tîpa Eyî yê Amedî. Ewja ra surgunê Zîndanê Riha, Zîndanê Sêwas, Mîdyad, Mêrdîn û tewr peynî Gebze bîye.”

 

'Kam cayê dinya de ameyo vînayene?'

 

Sevîme dîyar kerde ke kênaya aye 2 reyan amelîyat bîya û wina domnaye: “Rojbîne wexto ke Mîdyad de bî reyêk amelîyat bîye. Dima ra Gebze de bîye û kênaya mi de rîşa merdimwere ya rahîmî kewte. Aye ra zî amelîyat bîye. Ma nêzanî rewşa aye senî ya. 28 serrî yo ke tepişte ya. Kamî cayê dinya de ameyo vînayene? Kam cayê dinya de kesêk 28 serrî tepişte mendo? Senî ke no qanûnî ra tepişteyê bînî serbest ameyî veradayene, wa domanê ma zî serbest bêrî veradayene. Ma seyyewbînanîye wazenî.”

 

'Yew serrî yo mi kênaya xo nêvînaya'

 

Sevîme peynîya qiseykerdişê xo de înan ard ziwan: “Yew serrî yo mi kênaya xo nêvînaya. Seba ke weşîya mi ca de nîya, ez nêeşkena şêra pêvînayîş. Vîrus zî vejîya. Ma rewşa zîndanan nêzanî. Kênaya mi çîyêk nêvana. Timî vana ez baş a. Kênaya mi nêweş a. No qanûrî reyde domananê ma terkê mergî kerdî.”