STENBOL- Îdarekara Merkezê Pêroyî ya ÇHDyî û yew avûkata HHByî Dîdem Baydar Unsale derheqê xoverdayîşê rojeyê mergî ke mêrdeyê ci Aytaç Unsal zî tede ca gêno de, qisey kerde û va: "Helîn Boleke û Mustafa Koçakî emrê ciwan de, seba ke waştişê înan nêame bicaardene, cuya xo vindî kerdî. Ganî ma seba xoverdayoxanê rojeyê mergî bibê veng."

 

Hemverê Komeleya Huqûqnasê Hemdem ê Stenbolî (ÇHD) 2017 de operasyon ame kerdene û dima ra zî seba avûkatê ke tepişte bî, pêroyî de 159 serrî cezaya zîndanî ameye dayene. Avûkatan dîyar kerdib ke heqê înan ê muhakemeyê adîlane ameyo çinkerdene û dest bi çalakîya grevê veşanîye kerdibî. Avûkatan ra Ebru Tîmtîk û Aytaç Unsalî 5ê Nîsane Roja avûkatan de bi hemkarîya ÇHDyî îlankerdî ke çalakîya xo açernayê rojeyê mergî. Zîndanê Sîlîvrîyî de Ebruye roja 114, Aytaç zî  roja 83ine rojeyê mergî de yo.

 

Bêvengî bî sebebê di ganî

 

Endama Grup Yorumî Helîn Boleke bi amancê embazê ci ke ameyê tepiştene bêrê veradayene û qedexeyê serê konserê înan bêrê wedaritene, dest bi rojeyê mergî kerdibî û roja 288in de cuya xo vindî kerde. Helîne 28 serrî bî. Mustafa Koçakî zî bi waştişê muhakemekerdişêko adîlane kewtib rojeyê mergî û roja 297ine de zîndanê Tîpê F yê Hûmara 1 ê Şakranê Îzmîrî de cuya xo vindî kerd. Mustafa zî 28 serre bi.

 

Endamê Grup Yorumî Îbrahîm Gokçekî zî roja 313in rojeyê mergî de yo. Îdarekara ÇHDyî û avûkata Buroyê Huqûqî yê Şarî (HHB) Dîdem Baydare ke cinîya avûkatê ÇHDyî Aytaç Unsalî ya, derheqê rojeyê mergî de qisey kerde.

 

'Rojbîşyayîşê xo de dest bi rojeyê mergî kerd'

 

Dîdeme dîyar kerde ke avûkatê ÇHDyî 2 serrî û 6 mengî yo ke bi hawayêk bêhuqûqî yenê tepiştene û va: "5ê Nîsane de dest bi rojeyê mergî kerdî. A roje ê avûkatan a. 5ê Nîsana 2006 de embazê ma Behîç Aşci dest bi rojeyê mergî kerdib. Behîçî vatib, 'mi seba muvekîlanê xo heme çî kerd la ez nêbîya çareserî. 122 muvekîlê mi rojeyê mergî de cuya xo vindî kerdî. Ez zî seba înan rojeyê mergî de ya' Aytaçî zî rojbîyayîşê xo de 5ê nîsane dest bi rojeyê mergî kerd."

 

Waştişê rojeyê mergî

 

Dîdeme bale ante serê waştişan û va: "Embazê ma yê tepişteyî wazenê, bi hewayêko azad meslegê xo bikerê û bi hewayêko adîlane bêrê muhakemekerdene. Caardişê sey, şahdiê nimte bêrê wedaritene, kesê ke derheqê înan de tu tehqîqat çin o, hedef nêrê girewtene. Mustafa Koçakî seba muhakemekerdişêko adîlane dest bi grevî kerd û waştişê ci nêameyî qebulkerdene û cuya xo vindî kerd."

 

'Bi nêweşî û enfeksîyonî dir rîbirî yê'

 

Dîdeme dîyar kerde ke seba vîrusê korona êdî pêvînayîşî ameyê sînorkerdene û coka nêeşkenê embazanê xo bivînê û va: "Wezaretê dade vera ke hepsîyê sîyasîyan vera bido, heqê ke estê zî xesp keno. Vîrus ra embazê ma binê rîsk de yê. Semedo ke rojeyê mergî de yê, sîstemê xopawitîş înan qels o. Coka bi rîskê nêweşî û enfeksîyonî dir yenê rîbirî. Ganî pêro hepsîyê sîyasî serbest bêrê veradayene. Aytaçî xeylêk kîlo dayo ro. Ebruye zî wina ya. Ebruye roja 114ine de ya, Aytaç zî roja 88ine de yo. Waştişê înan, waştişê ma hemine yo. Seba waştişanê înan gerek ma vengê xo bidê eşnawitiş. Ciwîyayîşê înan destê ma de yo. Helîne û Mustafa emrê ciwanî de seba ke waştişê înan bica nêame cuya xo vindî kerdî. Ganî ma bibê vengê xoverdayoxanê rojeyê mergî."