ŞEHBA - Cinîyê Efrînijî yê ke kantonê Şehbayî de manenê û rojê xo bi ramitiş derbaz kenê, dîyar kerdî ke ramitiş ke kulturê cinîyan o ganî her wext kulturê xo bipawê.

 

Ramitiş cayêk ra bingeyê ciwîyayîşî yo. Tarîx ra heta ewro cinî bi keda destê xo ramitiş kerdê û ci dir eleqedar bîyê. Cinîyê Efrînijî bi 3 serrî yo kantonê Şehbayî de ciwîyenê. Rojê xo bi ramitişê zebze, fêkî û vilan, derbaz kenê. Goreyê îmkananê bîyaye, şert û mercê zehmetan ra zî reyna hewil danê ke kulturê ramitişî ke Efrînî de yeno kerdene, dewam bikerê. Derheqê babete de cinîyan ercnayîşê xo ma dir pare kerdî.

 

‘Ma rojê xo yê zehmet bi ramitiş dir derbaz kenê’

 

Cinîya bi nameyê Melek Mihemede wina qalî kerde: “ Wexto ke ma ameyî Şehba, ma xeylêk zehmetîyan dir rîbirî mendî. Keyeyê ma de herre û awe çinbî. Ma bi destê xo herre cayê bînan ra ard, seba ke ma lazimîyê xo bi ca bîyarê. Ma do kulturê xo her wext gane verdê û bipawê. Her zergûnayîyêk wextê xo de yeno ramitene, nika bi ameyîşê mewsîmê Hamnanî dir ma xiyar, firîngî, balîcan û bexdenûs ramit. Ma rojane xizmetê bostanê xo kenê.”

 

‘Şarê Efrînî ça de bê kulturê xo pawenê’

 

Cinîya bi nameyê Arîn Mehmûde zî vernîya çadire xo de zergûnayî ramita û wina va: “Bi 3 serrî yo ke ma Efrîn ra vejîyay û ma Şehba de bi ca bîyê. La ma herre û kulturê xo qetî xo vîr ra nêkerd. Şarê Efrînî ça benê wa bibê, kulturê xo pawenê. Welatîyê ke kampan de bi ca bîyê, verê çadiranê xo de zergûnayî û gul ramitê, hem seba xemilnayîşê kampe û hem zî seba kulturê xo yê bi hezar serran bipawê.”