MÊRDÎN - Vasîsi hepsîya nêweşa rîşa merdimwere Havva Aka ke zîndanê Gebzeyî de tepişte ya, wina va: “3in paketa hukmî, paketêka îqtîdarî tena seba hetgiranê xo veta ya. Hepsîyê sîyasî bi no hewa, terkê mergî ameyê kerdene.”

 

Zîndanan de îhlalkerdişê heqan her roje hîna giran benê. 3in paketa hukmî ya ke bi rayanê AKP-MHPyî ra Heyetê Pêroyî yê Meclîsî ra derbaz bî, hepsîyê sîyasî tede ca nêgirewtî û vera nê reaksîyonî dewam kenê. Bi seyan hepsîyê nêweşî, zîndanan de yê û tehlukeyê vîrusê korona zî vila beno. Keyeyê hepsîyan û hem merdimayî vera vîrusî bi ters û endîşeyîn ê. Hepsîya nêweşa rîşa merdimwere Havva Ake zî yew nê hepsîyan ra ya. Vasîsi Havvaye, Sînan Sayanî dîyar kerd ke ganî hepsîyê sîyasî serbest bêrê veradayene.

 

Dermankerdişê Havva nîno kerdene

 

Havva Aka ke mîyanê lîsteyê 74 hepsîyê nêweşan de ya. Havva, zîndanê Tîpê M yê Gebzeyî de tepişte ya. Havva, 48 serrî ya û 4 serrî verê teşîsê rîşa merdimwere ê cicikan dîya ro. Zîndan de dermankerdişê rîşa merdimwere dî û rewşa weşîya ci baş nîya. Eynî wextî de caytutanê xo ra zî nêweş a. Vasîsi Havvaye, Sînan Sayanî zî bale ant serê rewşa Havva û hepsîyê nêweşan û wina va: “Havva 1972 de Manavgatê Antalya de ameya dinya. 2004 de Sûrîye Havva, teslîmê Tirkîya kerd. 16 serrî yo zîndan de ya. Vernê de zîndanê Meletî de bî. Nika Gebze de ya. Nêweşa rîşa merdimwere ya. Nika nîna dermankerdene. Kontrolê aye yê rutîn ê 3 mengan estê. La seba vîrusî nêeşkena şoro Nêweşxaneyê Kocaelî. Bi mengêk zêde yo zî dermankerdişê ci zî nîno kerdene. Çend rey dayê la her wext ney.”

 

‘Hepsîyê sîyasî terkê qederê xo ameyê kerdene’

 

Sînanî qlîkerdişê xo wina qedêna: “Zîndan de tu tedbîr çin ê. Hepsî bi îmkananê xo vera vîrusî têkoşîn kenê. Nika şertê zîndanî de embazê nêweşî estê. Îqtîdarî pakete tena seba merdimanê xo veta. Hepsîyê sîyasî ci de ca nêgînê. Hepsî, terkê qedere xo ameyê kerdene. Ez seba rewşa Havvaye bi endîşeyîn a. Şert û mercê zîndanî, seba embazê ke dermankerdişê rîşa merdimwere vînenê rê baş nîyo. Rojo panşeme mi bi telefon têkilî da ro. Aye zî va, goreyê îmkananê xo pawitişê xo kenê û va, îdarekarê zîndanî tu tedbîr nêgirewto.”