WAN - Hemsereka HDPyî Wanî Oznur Bartune derheqê kampanyaya ‘Wayûbirayî' ya HDPyî çarçewaya têkoşînê vera vîrusî de da destpêkerdene de qisey kerde û vat: "5 hezarî keyeyî ameyî tespîtkerdene. 250 keyeyî bi zerrîwaşte ra kampanya de ca girewtî. Ez veng dana pêro kesanê ke îmkanê înan estê kena ke xo biresnê rêxistin merkez û qezayan.

 

HDPyî dimayê vîrusî bi amancê piştdayîşê kampanya 'Wayûbirayî' da destpêkerdene. Rêxistinê HDPyî serê qerarê merkezê pêroyî yê HDPyî dest bi xebatan kerdî. Wan de zî xebatî dewam kenî.

 

'Dewlete 2 mîlyon muracatî ra, tena cewabê 200 hezarî da’

 

Hemsereka HDPyî Wanî Oznur Bartune vat, bi vîrusî dir betalî zêde bîya û krîzê ekonomîye zî giran bîyo û vat: "Nê prosesî de paştdayîş girîng o. Ma seke partî kampanyaya 'wayûbirayî' da destpêkerdene. Ma partîyêka şarî yê. Coka paştdayîş hewce yo. Dewlete hîn îzahatan de vat, xo resnayî her cayî. La çi heyf, no vatişê babete nîyo. 2 mîlyon muracat bi û tena seba 200 hezarî cewab ame dayene."

 

'Paştdayene dewam kena'

 

Oznure arde ziwan ke koordînasyono ke bi bingeyê HDPyî de ameyo awankerdene de, STK, partîyê sîyasî, komele, sendîka û sazgehan ca girewto û vat: "Xebatê hempar ê ameyê kerdene de 5 hezarî keyeyî ameyî tespîtkerdene. Xeylêk keyeyan muracatê rêxistinê merkez û qezayan kerdî. Ma bi 2 hezar û 600 keyeyan dir kewtî têkilî. Xebatê ma hîna dewam kenî. Heta nika seba hezar keyeyan hetkarîya pere, seba 750 keyeyan hetkarîya kolîyan ame kerdene. Nêzdîyê 250 keyeyan zî bi hawayêko zerrîwaşte xebatan de ca girewtî."

 

'Seke her çî normal ramojnenê'

 

Oznure dîyar kerde ke polîtîkayê AKPyî komelî de ca nêgirewtê û vat, hewl danê ke her çî 'normal' ramojnê û Oznure qiseykerdişê xo wina dewam kerde: "Pêwa ke vîrus dewam keno, wazenê çîyan normal ramojnê. La no normalbîyayîş feqîrî werte ra nêdarenowe. Îqtîdarî demo ke welatê bînan ra hetkarî erşawitêne, welatê xo ra baş nêewnîya."

 

Oznure tewr peyîn wina vat: "Ganî ma paştdayîşê xo xurt bikerê û na nuqta de keyeyê ke îmkanê înan estê, ganî na kampanyaya de rol bigîrê.  Na nuqta de keyeyê wayîrê hîsgêrî, ganî muracatê rêxistinan bikerê."