RIHA - Remziye Karadaga ke Zîndanê Cinîyan ya Xarpêtî de tepişte ya daye zanayene ke komêk gardîyanî ke 20 kesan ra pê yeno ci û embazanê ci derb kerdî.

 

Remziye Karadaga ke Qawişê C-4 yê Zîndanê Cinîyan ya Xarpêtî de tewrê 3 embazanê xo yena tepiştene, bi rayîrê telefonî pîyê xo Salîh Karadagî reyde pêvînayîşêk pê arde. Remzîye telefon de daye zanayene ke 12ê gulane de komêk gardîyanî ke 20 kesan ra pê yeno ci û embazanê ci derb kerdî, laşê înan şîya û mor bîyo, la reyna zî revîr rapor nêdayo înan.

 

Remziye dîyar kerde ke her çiqas ke saetê hewagirewtişî yê înan nêqedîyabî zî gardîyanî bi zorî înan kerdî ode û wexto ke ê reaksîyon nîşan dayî na rewşe gardîyanî înan derb kerdî, înan nêberdî nêweşxane û rapor nêdîyayo înan.

 

Salîh Karadagî dîyar kerd ke kênaya ci vata ke zîndan de gardîyanî seba ke hêrişê hepsîyan bikerî yenî perwerdekerdene û do demêko kilm de hêriş zêde bibo. Salihî vat ke kênaya ci sere de veng daya Komeleya Heqê Merdiman (ÎHD) û heme dezgeyanê ke înan reyde pêvînayîş bêro kerdene û her kes na mesela de hîssin bibo.