Melîke Aydin

 

ÎZMÎR - Psîkolog Sevgî Turkmene dîyar kerde ke prosesê vîrusê de domanê ke keye de manenê, ganî ters ra bêrê pawitene. Sevgîye bale ante serê domananê ke zîndan de yê zî û vat: “Doman û suc nêeşkenê bêrê têhet. Ganî zîndanê domanan bêrê wedaritene.”

 

Psîklog Sevgî Turkmene bale ante serê psîkolojîyê domanan ê prosesê pandemîyî de û seba domananê keye û eynî wextî de domanê ke zîndan de pêşnîyarîyê girîngî kerd. Sevgîye dîyar kerde ke ganî prosesê pandemî de domanî ters ra bêrê pawitene û vat, ters hêzê pawitişî yê domanan anceno.

 

‘Ganî domanî ters ra bêrê pawitene’

 

Sevgîye ard ziwan ke domanî ters keyeyê xo ra gênê û vat: “Domanê ke bitersê vera îstîsmarî vengê xo nêvejenê, hetkarî nêwazenê. Yan zî heqanê xo nêfikrîyenê. Bixo bawerîya înan zî kêm a. Wexto ke vîrus yeno vatene zî, ganî endîşe û ters nêro awankerdene. Mektebî ameyî padayene. Merdim nêweşî eşkeno bi şibnayîşê şube qalî bikero. Domanî zêde zanayîşê înan na babete ser o çin o û coka înan dir ters awan beno.”

 

‘Seba domanî ters ra bêrê pawitene ganî vernê de şima xo bipawê’

 

Sevgîye bale ante serê reklamê ke televîzyonan de û çapemenîya komelî û eşkerayîye ke ganî domanî verê çiman de bêrê girewtene, hesabê nê çîyan bêro kerdene û wina dewam kerde: “Ganî ters û endîşe nêrê pîlkerdene. Seranserê roje temaşekerdişê televîzyonan, endîşeyan zêde keno. munaqeşeyê vîrusî, endîşeyan zêde keno. Ganî ewil ma xo ters ra dûr fînê û domanan zî wina ters ra bipawê. Sewbîna nê prosesî de keye zî nêaçernê mektebe. Bi domanan dir wextê weşan derbaz bikerê. Ganî domanan rê bi ziwanêko weş qalî bikerê. Domanî keye de zî kêfweş ê. Eke bi ziwanêko weş qalî bikerê do domanî fam bikerê.”

 

‘Ganî zîndanî nêrê xovîrakerdene’

 

Sevgîye bale ante serê domananê ke zîndan de yê û wina vat: “Ganî serê rîyê erdî de konseptê zîndanê domanan bêro wedaritene. Domanî û suc, nêeşkenê bêrê têhet. Eke domanî zirar bidê yewî bînî, bişik sebebê ci komel o. Ganî derheqê problemê domanan de çareserî bêro kerdene. Domanî do dewlete, gardîyan û kesê ke nas nêkenê bêşik bitersê. Ganî domanî nêrê tepiştene. Hewcedarîyê domanan bi nesihetan çin o, bi ciwîyayîş esto. Ganî lezabez zîndanê domanan bêrê wedaritene.”