WAN - Xezal Şadala ke nêweşa qelbî ya û kêna û lajê aye teêişteyê, hîrê serrî yo înan nêdîya. Xezale dîyar kerde ke ganî seba hepsîyê sîyasîyan efû vejîyo û vat: “Ez wazena domananê xo bivîna.”

 

Vîrusî ra Tirkîya de 4 hezar kesî dinyaya xo bedilna û hûmara testanê pozîtîf zî vejîya 145 hezarî. Heto bîn ra zî eşkerayîyê prosesê ‘normal’ ameyî dayene. Zanistan dîyar kerd ke beno ke pêlo diyîn bêro û tedbîr bêrê girewtene. Cayê tewr bi rîsk zî zîndan ê. Qanûnê înfazî ke ame vetene, tena hepsîyê edlî ci ra feyde girewtî. Hepsîyê sîyasî teberê qanûnî de ameyî verdayene. Dayîka hepsîyan, Xezal Şedale zî reaksîyon ramojna û vat, kêna û lajê aye bi serran o tepişte yê û vat seba domananê xo bi endîşe ya.

 

‘Baş wey nêbenê’

 

Xezale dîyar kerde ke kênaya ci Mahsume Şadale 2004ine de Stenbol de ameya tepiştene û nika zîndanê Şakranî yê Îzmîrî de ya û vat: “Domanê mi zîndanan de baş wey nêbenê. Seba vîrusî rewşa înan baş nîya. Hewcedarîyê înan nînê peydakerdene. Maske û deterjan nînê dayene. Hepsî keyeyanê xo ra çîyêk pawenê. La ma seba vîrusî nêeşkenê çîyêk bikerê.”

 

‘4 serrî yo lajê mi hucre de yo’

 

Xezale ard ziwan ke lajê aye zîndanê Tîpê L yê Balikesîrî de tepişte yo û wina vat: “4 serrî yo lajê mi hucre de yo. Ez wazena domanê mi bêrê veradayene. Bi sebebê lajê mi zî hetkarî dayo waya xo ame tepiştiş. Şertê zîndanî baş nîyê.”

 

‘Êdî hêzê mi nêmend’

 

Xezale tewr peyîn da zanayene ke aye êdî wazena domanê aye verê aye de bê û vat: “Seba nêweşîya qelbî, ez nêeşkan şîrî verê domananê xo. Ez seba domananê xo bi endîşe ya. Dejê domanan zaf giran o. Hêzê mi nêmend. Êdî bes o. Ez wazena domanê mi verê mi de bê. Domanê ma tena seba rumetê xo pawitî, ameyî tepiştiş. Tu sucê înan çinbi. Seba heqanê xo pawitî ameyî tepiştene. Wa zîndanî êdî abê.”