ENQERE - Endama Meclîsê Cinîyan ê HDPyî Îlknur Bîrole, dîyar kerde ke do Belgeyê Helwestî ke HDPyî eşkere kerdo do kçueyan de bi ca bîyarê û vat, semedê heme bindestan lazimî bi rayîrêk newe esto û va do meclîsê cinîyan cepheyê vernî de bê.

 

Hemserekê Pêroyî yê HDPyî rojê vîyar te de Belgeyê Helwestî eşkera kerdî û metnî de 9 sername ca gênê. Endama Heyetê Îdareyê Merkezî (MYK) û endama Meclîsê Cinîyan ê HDPyî Îlknur Bîrole derheqê belgeyî de û xeta têkoşîn û rêxistinê cinîyan de qisey kerde.

 

Îlknure wina qisey kerde: "Seba pêro hemleyê otorîter bi rayîrê demokrasî bêrê çareserkerdene, qerarê girîngîyê ameyîşê têhet û têkoşînêko hempar ame girewtene. Belgeyê Helwestî bi tifaqê demokrasî dir, bî hemleyêko rojane. Belgeyê Helwestî yeno manaya sîyasetê demokratîk û yewîya demokrasî de israr. Hewcedarîyê heme bindestan bi rayîrêk newe û demokrasî esto. Belgeyê Helwestî na babete de zî xeylêk girîng o.”

 

'Bêtêduştî û feqîrî zêde bîyo'

 

Îlknure vatişê xo wina dewam kerde: “Tifaqê AKP û MHPyî heqê xeyalê zî welatîyan ra girewto. Nê proseso ke her çî bi şîdet wey beno, bêtêduştî û feqîrî zêde bîyo. Talanê xoza resayo sewîyeyêka xidar,  îstîsmarê domanan û şîdetê serê cinîyan zêde bîyo. Merdimî wazenê rayîrêk bivînê. Rayîrê nê zî têkoşîn o. Heqê demokratîk û azadîye sewîyeya unîversal de ameyê nasnayene. Seba nê ganî nê heqî bêrê dayene."

 

Sernameyê belgeyî de

 

Îlknure bale ante serê sernameyê belgeyî de û dîyar kerde ke do seba sîstemê edaletî bikewo binê asayîşî û bireso sîstemêko bi edalet do têkoşîn bikerê. Îlknure wina dewam kerde: "Heme dinya û Tirkîya de karker û kedkarî destheqê xo nêgînê. Prosesê pandemî de no tewr zêde bi. Şertê xebatê koletî yenê ferzkerdene û heqê rêxistinbîyayîşî yenê bêtesîrkerdene. Rayîrêk newe de ganî heme hetê demokratîk bêrê têhet. No lazimîyêko pîl o. Eke merdim otorîte û rejîmê tedayînan ra xilas bibê, demokrasî zî mimkun o."

 

'Meclîsê cinîyan bi tevgerê cinîyan dir ê'

 

Îlknure tewr peyîn qiseykerdişê xo wina qedêna: "Meclîsê cinîyan demêko derg o xebatan keno. Bi tevgerê cinîyan dir, rojeva cinîyan û nuqteyê rêxistinbîyayîşê cinîyan de hemle ameyî eştene. Meclîsê ma yê cinîyan zî do têkoşînî de her wext cepheyê vernî de bê."