AMED - Vera hêriş, destbendkerdene û tepiştişan, Endamê Meclîsê Dayîkê Aştîye reaksîyon ramojnayî. Makbûle Ozbeke, dîyar kerde ke vera hêrişan ganî yewîya kurdan bi ca bîyarê û Nezahat Teke zî va: "Gelo vera hende hêrişan ma senîn bêveng bimanê?"

 

22yê gulane de hemverê sîyasetmedaran, akîvîstê Tevgerê Cinîyanê Azadan (TJA), endam û îdarekarê Komeleya Cinîyan a Rosa û endama Meclîsê Dayîkê Aştîye Havva Kirane operasyonêk ame kerdene û 12 kesî ameyî tepiştene û semedê Havva zî cezaya hepsê keyeyî ame dayene. Sewbîna wekîltîyê Hemsereka Kongreya Komeleya Demokratîk (KCD) û parlamentera Partîya Demokratîkî ya Şaran (HDP) ya Colemêrgî Leyla Guvene û parlamenter Mûsa Farîsogullari ame fînayîş û dima ra zî ameyî destbendkerdene. Ciwanêko emnîyet de bi îşkence dir rî bi rî mend û ciwanêk zî seba goşdarkerdişê deyîra bi kurdî ame kiştene. Endamê Meclîsê Dayîkê Aştîye yê Amedî Makbûle Ozbeke û Nezahat Teke bale ante serê nê çîyan û vatî ganî vera hêrişan yewîya neteweyî bi ca bêro.

 

Makbûle, destpêkê qiseykerdişê xo de bale ante serê hewcedarîyê yewîya neteweyî û vat: "Pêro dayîkî dej ancenê la dej û kulê dayîkê kurdan tewr zêde yo. Wa dayîkî wirzê serê lingan, şîyar bibê û xemsar nêbê. Hêzê dayîkan ke rayberîya aştîye kenê, eşkenê rayberîya yewîye zî bikerê. Serê komelê kurdan de tersêk yeno awankerdene. Erjê ma yenê talankerdene, Bîyayîşê ma yeno qedexekerdene, domanê ma yenê kiştene; gelo ma do êdî çira bitersê? Seba parçebîyayîşê ma qasê xo dej û jan antê."

 

'Ganî ma wayîrê herra xo vejîyê'

 

Makbûle wina dîyar kerde: "Wehşetê ke Kurdî ri bî rî mendê, tu cayê dinya kes raşt nêameyo. Cenazeyê ma berdî binê cehdeyan de defin kerdî û goristanê ma ameyî texrîpkerdene. Eke ma wayîrê nê erjan nêvejîyê, gelo ma do key wayîrê yewbînan vejîyê? Ganî yewîye bibo. Vera hêrişan kongreya mîyanneteweyî ganî bêro organîzekerdene. Awe û herra Kurdistanî seke zerdî ya û tîya dewlete tena berjewendîyê xo fikrîyenê. Ganî ma wayîrê herra xo vejîyê."

 

'Gelo ma do senîn bêveng bimanê!'

 

Nezahate derheqê babete de wina qisey kerde: "Çîyê ke nêameyo serê Kurdan nêmendo. La ewro, ‘wa çîyêk nêro sereyê ma' Kurdî xo bêveng kenê. Cayê ke zulm bibo, ganî uca de xoverdayîş bibo. Şarederîyê ma ameyî xespkerdene û parlamenteranê ma tepişnayî. Bi hezaran kurdî nika seba nasnameyê xo tepişnaye yê. Ma qetî hêrişê ziwan û erjê tirkan nêkerd. La ewro tirkî hêrişê erj û ziwanê ma kenê. Ciwanêko seba ziwanê kurdî ame kiştene. Gelo nê zorêr çîyêk bîn esto? Gelo bîyayîşê merdiman bêro qedexekerdene, ma do senîn bêveng bimanê."

 

Nezahate tewr peyîn wina va: "Zulmo ke ma vînenê, tu cayê dinya de çin o. Nimûneyo tewr girîng zî Dayîka Xalîse ya. Labelê tena dayîkî zanê ke no senîn zulmêko giran o. La ma qetî nêvanê, ma merdî wa ê zî bimirê. Ma bi yewîye eşkenê hemverê berjewendîyê dewletanê îşxalkerdoxan têkoşîn bikerê. Wa kurd êdî îxanetê mîyanê xo de peynî bikerê. Vera zulmî ganî kurdî yewîya xo bi ca bîyarê."