Dilûcan Bozî

 

KOBANÊ - Cinîyê Kobanî yê ke mîyanê bazarî de lazimîyê xo gênê, bale antî serê rewşa ciwîyayîşî yê zehmetî û serê vayîya bazarî de esta û wina qisey kerdî: “Dimayê ke lîreyê Sûrîye hemverê dayeyê dolarî kewt bin, êdî vayîyêke pîl bazar de virazya. No zî rewşa ciwîyayîşî zehmet keno.”

 

Dimayê ke qanûnê Qeyser serê Sûrîye de ame kerdene, êdî lîreyê Sûrîye zî hemverê dayeyê dolarî de kewt bin. Qanûnê Qeyserî tesîrêko pîl serê rewşa ciwîyayîşê Sûrîyeyijan kerd, taybet bajarê Sûrîye yê ke mîyanê teşqeleyî kûr de yo. Şar hetê ekonomîye ra zehmetîyan ancenê û vayîyêk xidar mîyanê bazaran de yeno vînayene. Derheqê babete de cinîyê Kobanijî yê ke mîyanê bazarî de lazimîyê xo gênê, serê rewşa ciwîyayîşî ya zehmetî ser de şîroveyê xo ma dir pare kerdî.

 

‘Tesîrê Qanûnê Qeyser serê ma de zî esto’

 

Cinîya bi nameyê Asya Mihemede dîyar kerd ke dimayê ferzkerdişê Qanûnê Qeyserî serê Sûrîye, êdî rewşa şarî zehmet bena û wina vat: "Dewletê mîyanneteweyî derbazê herêmê ma bî û pereyê xo mîyanê herême ma de xebitnayî. Xora dimayê ferzkerdişê nê qanûnî, rewşe êdî ver bi xirabîyayîşî şina. Ma bi zehmetîyê pîl, domananê xo wey kenê. Omidê mi oyo ke nê dewletê mîyanneteweyî herra ma ra vejîyê ke ma bi hizur biciwîyê û debara cuya xo bikerî.”

 

‘Lazim o êdî çareserîyêk bêro vînayene’

 

Cinîya bi nameyê Nehîde Fethî zî serê babeta vayîye de şîrove kerd û wina vat: “Bi caardişê qanûnî ser o yê ke tewr zêde dej antî reyna şar bi. Lazimîyê ma xeylê bi çîyan estê. La ma nêeşkenê bigîrê. lazimo çareserîyêk no krîzî rê bêro vînayene. Seba ke xetereyê ciwîyayîşî êdî xidar bena.