AMED - Fatma Hekîmoglu û Ayşe Odena ke wayê yewbînan ê, pey xeyalê xo şîyê û cayêko de werdê keyeyî akerdê. Her di wayêyan dîyar kerdî ke cinî xo bi xeyalan sînordar nêkenê û eke biwazê eşkenê her karî bikerê.

 

Fatma Hekîmoglu û Ayşe Odena ke wayê yewbînan ê, semtê Ofîsê Yenîşehîrê Amedî de lokanta akerdê û nêzdîyê di serrî yo bi nê dukanî debara xo kenê. Her di wayê ke pey xeyalê xo yê domanîye şîyê, tewr peyîn biqasê îmkananê xo xeyalanê xo bi ca ardê û nika dukanê xo de werdê keyeyî viraznenê û pê debara xo kenê. Fatma û Ayşe ke vanê, ma wazenê karê xo de aver şorê û cinîyê bînan rê zî benê îlham û cayê îstihdamî akerdî, ajansê ma rê ercnayîş kerdî.

 

‘Ma pey xeyelanê xo şî’ 

 

Fatma dîyar kerd ke dukan xeyalê înan domanîye yo û vat: “Mi û waye xo her wext karêko wina xeyal kerdêne, sdba ke ma viraştişê werdî ra xeylê hes kerdêne. La semedo ke îmkanê ma çinbî, ma bi serran xeyalê xo bi serran taloq kerd û ma verê kesê bînan de bi heqroj xebityayî. Dimayê bi serran ma xeyalê xo bi ca ard û nêzdîyê di hîrê hewteyan ma dukanê xo akerd.”

 

‘Eke cinî biwazê eşkenê her çî bikerê’

 

Fatma qiseykerdişê xo wina dewam kerd: "Seke her karî xidarîyê nê karî zî estê. Hem hetê ekonomî de û hem zî hetê manevîyatî de xidarîyê karê ma zî esto. Nê karî de ganî destê to şenik bê û kedêk zêde wazeno. Labelê xeylê rey kede cinîyan nîna vînayene. Cinîyê xebatkarî bi qasê camêrdan xebityenê la xeylê cayan de înan ra tay pere gênê û bêasayîş yan zî sîgorta yenê xebitnayene. Ge-ge zî vernîyê têkoşîn û kede cinîyan yeno girewtene. La êdî cinî ferqê keda ke danê de yê û astengîyê hemverê xo derbaz kenê. Ma emrê qij de xebityayî. Seba wendişî îmkanê ma çinbi. Eke ma mektebe biwendêne, beno ke ma zaf serkewte bibayîne. Ameyox de zî wazena xebatanê xo pîl bikerî û bi taybetî seba cinîyan îmkanan awan bikerî û cayê îsthdamî abikerî. Ganî cinî xo bi xeyalê xo sînordar nêkerê. Eke cinî biwazê eşkenê her karî bikerê.”

 

‘Xebata cinîyan qij yena vînayene’

 

Waya Fatma, Ayşe zî dîyar kerd ke aye bi bawerî û hêzê xo serê limgan de vinderta û vat: “Ma xeylê çî bi hewldanê xo kerdî. La keda cinîyan nîna vînayene û karê înan qij yeno vînayene. Semedê nê xeylê cinî cayê karî de bi hêrişê cinsî yê fekî yan zî bi mobîngî dir rî bi rî yenê. Semedê vindertişê vera cinîyan xeylê kesî hedê xo derbaz kenê. Coka xeylê cinî xebatanê xo de xeylê rey huyayîş zî seba xo sûc vînenê û rîyê xo ra kêm kenê. Ganî cinî hemverê nê nêheqîyan zî têkoşîn bikerê û hîn çîyan bivurnê. Ganî cinî bi seknê xo xeylê çîyan bikerê dest û vengê xo hîna xurt berz bikerê. Sewbîna ganî cinî bieşko vaja ‘nê’.”