ŞIRNEX - Dewa Rihanî ya qezaya Silopîyî, cinîyê ke karê fistiqan de xebityenê ardî ziwan ke vera pêro zehmetîyê ke vînenê keda înan nîna vînayene û vatî: “Ma mîyanê roje de binê tîjî de xebityenê, hende zor û zehmetî vînenê û bi pereyêko xeylê tay xebityenê.”

 

Cinîya bi nameyê Sacîde Kaçmaze (26) ard ziwan ke înan menga Nîsanê de dest bi ramitişê fistiqan kerdê û tim yenê seba ke tevrik bikerê. Sacîde, va ke karê ke kenê xeylê zehmet o, la semedo ke tu karêk bîn çin o û wina vat: “Wexto ke ma menga Nîsane de dest bi ramitiş kenê dima ra gama ke zergûn bibo ma kom kenê. Wexto ke fistiqî newe zergûn benê ma yenê derman û zibil kenê. Ma tim û tiç yenê awe danê. Ma mabêne menga êlule û teşrîna verêne de zî dest bi komkerdişê înan kenê. Dimayê ke ma nê fistiqan kom kenê, benê verê tîjî de ziwa kenê û kenê tûrikan.”

 

‘Keda ma yena werdene û nîna vînayene’

 

Sacîde, dîyar kerde ke ramitişê fistiqan goreyê serra vîyarte hîna zêde yo û wina vat: “Mi xeynî nê karî, karê pembûyan zî kerdêne. Labelê êdî tu kesî tîya pembe nêremneno. No karo ke ma kenê, rastî zî zaf zehmet o. Semedo ke xebata binê tîjî de xeylê zehmet o. Labelê ma seba debara xo bikerê, ma mecbûrî bixebityê. Ez nêwazena mihtacê tu kesî zî bibî. Vera pêro heme zor û zehmetîyan ma serê linganê xo de manenê û debara xo bi xo kenê. Tîya ez tena nîya, xeylê cinî estê û ma pêro eynî zehmetîyan ancenê. Pêro zî seba debara xo bikerê xebityenê.”

 

‘Ma nêwazenê keda ma bêro werdene’

 

Cinîya bi nameyê Nurşîn Ordogane (18) zî vat, seba paştdayîşî bida keyeyê xo nê karî kena û wina vat: “Ma serê siba rew yenê dest bi kar kenê heta şan de. Roja ma tîya xeylê zor û zehmetî derbaz bena. Helbet zehmetîyê pêro karan estê. Ma tîya binê tîjî de xebityenê û zaf germ o. Ez nika karê fistiqan kena, wextê menga teşrîna verêne ez o şêrî şaristananê Mêrsîn û Antalya. Ez o uca de zî 5 mengan bixebityî. Adare de zî yena şaristanê xo. Karê ma zehmet o û qezencê ma kêmî yo. Tîya 70 cinî estê. Semedo ke erdê bînî zî estê xeylê cinî şinê uca de zî xebityenê. Ma nêwazenê keda ma bêro werdene.”