Şehriban Aslan

 

AMED - Kayapinarê Amedî de camêrdo bi nameyê Mehmet Fîlîzo ke di domanê ke kuçe de peçete rotêne, îstîsmar kerd û nê ser Serdozgerîya Komara ya Amedî îdianame amade kerd. Îdianameyo ame amadekerdene de seba gumanbar 40 serrî ceza ameye waştene, la dadgehe roniştişê diyîn de tahlîye kerd.

 

Camêrdo bi nameyê Mehmet Fîlîz, 2017 de qezaya Kayapinarî ya Amedî de hêrişê cinsî de di domanî bi nameyê N.G û Ş.E kerd. Serdozgerîya Komara ya Amedî serê nê sûcî ‘istîsmarkerdişê domanan’, ‘bi tehdîdê cebîr û xîleyê kesî azadîya bêpar verdayî’ îdianame amade kerd. Îdianameyî de seba gumanbar 40 serrî ceza ameye waştene. Îdianameyo ke ame amadekerdene de ame vatene ke domanan ra N.G cuya xo vindî kerda û Ş.E zî nêzanê ça de ya.

 

Domanan xapêna û wesayît de îstîsmar kerd

 

Îdianameyo ke ame amadekerdene de ame vatene ke ke Kayapinar de cayê lambeyê trafîkî de Ş.E û N.G peçete rotêne, ameyê xapênayene û wesayît rê ameyê esparkerdene. Îdianameyî de ame vatene ke domanî rastî hêrişê cinsî yê Mehmet Fîlîzî ameyê, domanî qîrayê û no ser de wesîtê asayîşî nêzdîyê înan bîyo û rewşe ferq kerdo.

 

Pawitişê gumanbarî: Mi vat qey muşterî yê

 

Îdianameyî de gumanbar Mehmet Fîlîzî îfadeyê xo de hêrişê zayendî qebûl nêkerd û nê îfadeyî îdianameyî de ca girewtî: “Domanan destê xo berz kerd, mi zî sey muşterî dî, mi vat ez înan berî cayê ke şênê, ma di kîlometre şî, domanan nêzanayîne şêrê ça û mi înan wesayît ra da ro.” La domanê babeta vatişî yê, lambeyê trafîkî de peçete rotêne û 2004 û 2005 de ameyê dinya.

Dozgerî seba gumanbar bi pêroyî 40 serrî ceza waşt. Îdianame hetê 6in Dadgeha Cezaya Giran ra ame qebûlkerdene. 2019 de roniştişê diyîn ame vînayene û ame vatene ke domanan ra N.G cuya xo vindî kerda û sebebê merdişê aye Mudirîyê Weşîye Amedî rê ameyo nuştiş û cewab nêameyo dayene. Roniştişê diyîn de semedê gumanbarî qerarê tehlîye ame dayene.