DÊRSIM - Dewa Sorekî ya Mazgîrtê Dêrsimî, cinîya bi nameyê Turkan Aslane vera talankerdişê xozaya dewa xo cinîyan dir bi paştdayîş cuya xo dewam kena. Turkane vera ocaxê kerra yê dewe de wazenê viraznê reaksîyon ramojnena.

 

Turkan Aslana 72 serrî dewa Sorekî ya Mazgîrtê Dêrsimî de cuyena wina “Pêwa heme karî, keye de zî ewnîyenê domanan ra werd amade kenê û xeylê çî ma kenê. Ma hende xebityenê û kedêka pîl danê zî problemê ekonomîye ma ciwîyenê. Bi vejîyayîşî rojî dir ma wirzenê xebityenê. Ma şênê serê erdî, ma ramitiş kenê. Ma heywanan wey kenê û ancenê. Ma yenê keye û werd hadre kenê. Dima ra ma şênê bostan. Her karêk cinî kenê. Roja cinîyan wina derbaz bena. Emrê mi zî aver şîyo, ez nêeşkena bixebityî.”

 

‘Mîyanê cinîyan de paştdayîş û hetkarî esta’

 

Turkane dîyar kerd ke cîranîya dewe zaf samîmî û weş a û wina vat: “Cinî pîya paştdayîş de yê. Pîya dem derbaz kenê. Cîranê ma heme merdimê baş ê. Ma pîya dem derbaz kenê. Ma cinî yewbînan ra hes kenê. Ma hetkarî danê yewbînan. Seba ke ma yewbînan baş fam kenê.”

 

‘Ganî hêrişê vera xozaya ma peynî bê’ 

 

Turkane vat ke netîceyê îhaleyê hetê Wezaretê Daristan û Ramitişî ra ameyo akerdene de qerarê qetilkerdişê 17 pezkuvîyan ame dayene û serê reaksîyonî qerar ame betalkerdene û vat: “Ma vera qerarî xeylê aciz ê. Dewe de yeno waştene ke ocaxê kerreyan viraznê. Ganî nê hêrişî peynî bê. Eke çîyêk wina bêro kerdene do xoza û tarîxê ma çin bibê. La do têkoşînê ma dewam bikero.”

 

‘Ez wazena ageyrî dewa xo’

 

Kênaya Turkane, Fîlîz Çîftçî zî Stenbol ra her hamnan yena dewa xo û wina vat: Ma bêrîya dewa xo kenê. Stenbol de xoza nêmendo. Her ca bîyo beton. Merdimî nêeşkenê boya xo bidê. Ma dewe de kêfweş ê. Ma wazenê ageyrê dewa xo.”